Banat ( Leaderboard Top ), pagematch: 1, sectionmatch: 1

Nagkuha og police clearance gidakop; nagpusil sa kagawad nasikop

CEBU, Philippines — Gidakop sa kapolisan diha sa police station sa Barangay Magay, lungsod sa Consolacion ang usa ka 31-anyos nga lalake kinsa nagkuha lang unta og police clearance human masuta nga aduna diay kini  kaso nga gipasaka sa iyang asawa batok kaniya niadtong miaging tuig.

Si Marlon Deña Ruta nagdahom nga gibakwi sa iyang asawa nga si Maegen Deña Ruta ang kasong gipasaka niini batok kaniya.

Si PO3 Mylen Edejer sa Women and Children’s Protection Desk sa Compostela Police Station mibutyag nga si Marlon gipasakaan kini og kasong “violation against women and children” ni Maegen niadtong Mayo 25,     2016.

Giingong gisagpa ni Marlon si Maegen atol sa ilang away hinungdan nga ang maong asawa mipasaka dayon og kaso sa iyang bana apan human sa milabay nga tulo ka buwan ang duha nagkauli kini.

Ug wala na sa ilang huna-huna ang maong kaso apan si Marlon nalutsan kini og warrant of arrest nga giluwatan niadtong Oktubre 24, 2017 ni Regional Trial Court (RTC) Judge Alexander J.V Acosta sa Branch 9, dakbayan sa Sugbo.

Giingong si Maegen nibalik sa buhatan sa PWC ug mihangyo sa polis nga bakwion na niya ang kasong iyang gipasaka batok sa iyang bana.

Ang magtiayon kinahanglang moatubang kini ngadto sa korte aron sila adto maghusay sa nahisgutan nilang problema.

Sa laing bahin, nadakpan ang suspetsado sa pagpusil patay sa usa ka kagawad sa Barangay Damolog, lungsod sa Sogod niadtong Lunes sa hapon ngadto sa Barangay Poblacion, lungsod sa Matalom, Leyte.

Ang biktima mao si Kagawad Roberto Abalos, 60-anyos ug ang suspetsado giila nga si Sam Pandapatay, 44-anyos, lumad nga taga Marawi City ug nagpuyo kaniadto diha sa Lungsod sa Sogod diin aduna kini tindahan sa mga cellular phone.

Ang maong pagsikop ni Pandapatan pinasikad kini sa warrant of arrest sa kasong murder nga giluwatan ni Regional Trial Court (RTC) Judge Jerry Dicdican sa   Branch 25, dakbayan sa Danao.

Ang maong insidente sa pagpamusil nahitabo niadtong Marso 30, 2017 diin giingong si Pandapatan nagselos kini tungod kay ang kagawad giingong nakigrelasyon sa kapuyo sa suspetsado.

Human sa hitabo si Pandapatan misibat kini ug nagtago-tago. (BANAT NEWS)

  • Follow Us: