Tanod mo-report kaduha matag buwan

CEBU, Philippines — Niluwat og memorandum si Cebu City Mayor Tomas Osmeña nga kaduha na lang sa usa ka buwan moduso og accomplishment report ang mga tanod sa 80 ka barangay sa dakbayan.

Kini subay sa hangyo sa mga barangay kay matud pa dili nila maato sa mga tanod ang paghimo ug pagpasa sa weekly accomplishment report.

Ipaduso sa petsa 5 ug 25 sa matag buwan ang accomplishment report ngadto sa Cebu City Office for Substance Abuse Prevention (COSAP).

Tumong niini nga dili mauwahi og duso sa ilang report ang mga tanod nga maoy basehan sa paghatag sa ilang honorarium.

“If they work very hard we’ll double it (sweldo), no problem. The issue is whether they earn what they’re getting,” matud ni Osmena.

Sa bag-ong memorandum gi-simplify sab ang pagduso sa accomplishment report.

“They have to identify what is the critical areas ug unsa ilang mga spots niya giunsa man nila pag-address ang maong problem,” matud sa pangulo sa COSAP nga si Garry Lao.

Unang nadiskubrehan ni Lao nga adunay reports nga katuohan dili human iyang gibasa ang detalye niini.

Buot sab ni Lao nga apilan og mga hulagway sa ilang mga girespondehan nga kriminalidad. (BANAT NEWS)