PDEA agresibo bisan kuwang og tawo

CEBU, Philippines — Bisan sa kakuwang sa mga agents, ang bag-ong director sa Philippine Drug Enforcement Agency-Central Visayas nisaad sa gobernador nga magpabilin nga subsob ang ilang kampanya batok sa ilegal nga drugtas.

Si Emerson Margate atol sa courtesy call ngadto kang Gobernador Hilario Davide III kagahapon nagkanayon nga aduna lang silay 45 ka enforcement personnel sa PDEA-7.

Matud niya nga plano nila nga magdugang og personnel tungod sa ka daku sa problema sa ilegal nga drugas.

Si Margate niawhag sa mga local chief executives ingon man sa kapolisan nga bisan pa man nga ang PDEA na ang gitahasan sa paggukod sa mga nalambigit sa ilegal nga drugas nga tabangan gihapon sila ilabi na sa pag-monitor sa mga illegal drug activities sa mga lugar.

Samtang duha ka tawo ang nasikop atol sa buy-bust operation sa mga sakop sa PDEA-7 sa may Barangay Lower Pakigne, Lungsod sa Minglanilla alas 4 pasado kagahapon sa kaadlawon. 

Ang nasikop mao sila si Evangelyn Medalla, 49, subject sa buy-bust, ug Sharon Alicaya, 33-anyos.

Matud ni Lea Albiar, tigpamaba sa PDEA-7, nga nasakmit nila sa dinakpan ang lima ka pakete sa shabu nga balor og dul-an sa P118 mil. Ang mga dinakpan kasamtangan una nga gitanggong sa lock-up jail samtang gipaabot ang pagpasaka og tukmang kaso. (BANAT NEWS)