Brgy service caravan sa Mandaue palapdan
CEBU, Philippines — Gihugupan kagahapon sa pagpahimulos sa mga molupyo sa Banilad, Dakbayan sa Mandaue ang Barangay Service Caravan nga gipasiugdahan sa kagamhanan sa dakbayan.
Si Mayor Gabriel Luis “Luigi” Quisumbing ang nagpasiugda sa maong kalihukan sa matag semana sa tuyo nga mapaduol ang kagamhanan ngadto sa katawhan nga nagpaabot nga ilang kalaagaran.
Naglakip sa mga serbisyo nga gitantyag ang libreng check-up sa panglawas ug dinalian nga pagproseso sa mga dokumento sa paghatag og katagbawan sa katawhan sa ilang pagpangalagad sa katilingban.
Matud pa ni Quisumbing nga ilang paningkamutan nga magkalapad pa ang ilang Barangay Service Caravan sa umaabot nga mga adlaw tungod kay mokuyog man sab niini ang uban pa nga mga buhatan sa kagamhanan.
Ang Barangay Service Caravan unang gisugdan ni Quisumbing sukad pa kaniadto nga dili pa siya mayor tungod kay daan na kini niyang gihimo kaniadto pa nga kongresista pa siya sa ika-unom nga distrito diin sakop ang Dakbayan sa Mandaue, ug mga Lungsod sa Consolacion ug Cordova. - /GMR) (BANAT NEWS)
- Latest