Nanayaw, gi-post sa FB oras tingtrabaho imbestigahon

CEBU, Philippines — Ipatawag sa kagamhanan sa Syudad sa Talisay ang sakop sa City of Talisay-Traffic Operation Development Authority (CT-TODA) nga nakit-ang nagsayaw-sayaw sa ilang buhatan sa oras tingtrabaho ug gi-post sa Facebook.

Si Atty. Rudelyn Navarro, city administrator nibutyag nga iyang ipatawag si Almond Dela Peña, pangu sa CT-TODA ug ipangutana labot sa kalihukan sa iyang mga sakop.

Siya nagkanayon nga iyang pangutan-on si Dela Peña kay sa iyang nahibaw-an wala malakip sa trabaho sa CT-TODA ang pagsayaw-sayaw diha sa ilang buhatan kundi diha lang sila sa karsada nga makit-an.

Aduna say memorandum si Navarro nga nagdili sa mga kawani paggamit sa Facebook gawas lamang sa opisina sa Public Information Office (PIO), buhatan sa mayor ug sa iyang opisina tungod mao man kini ilang gigamit  sa komunikasyon.

Ang masakpang mulapas sa maong kamanduan hayan mag-atubang og silot.

Ang maong insidente ilang ipaagi sa grievance committee ug sa Human Resource Management Office. - /IBM) (BANAT NEWS)