Pagtukod og MRF aprub sa komitiba

CEBU, Philippines — Pabor ang Committee on Laws, Ordinances and Styling sa  ordinansahon nga mag-establisar og Material Recovery Facility diha sa kontrobersiyal nga Inayawan Landfill.

Niadtong Nobiyembre 7 ning tuiga, ang komitiba mi-isyu og ‘favorable report’ sa sugyot ni Konsehal Eugenio Gabuya Jr., Chairman sa Committee on Public Services nga pagtukod og MRF.

Mirekomendar ang komitiba nga ang maong proposed measure i-refer sa Committee on Budget and Finance ingon man sa Committee on Environment alang sa comment ug recommendations.

Kini aron sab ma-schedule ang public hearing aron madungog ang sentimiyento sa katawhan bahin niini karong Disyembre 13.

Giimbitar sab sa City Council ang Regional Director sa Environmental Management Bureau (EMB)-7 Engr.  William Cuñado.

Ang maong committee report gipirmahan sa Chairman sa Committee on Laws Konsehal Sisinio Andales uban sa ilang mga miyembro Konsehal Joy Augustus Young ug Alvin Arcilla.

Hinoon sa wala pa aprubahi ang committee report sa ubang miyembro sa konseho, ang kanhi Chairman sa Committee on Laws Konsehal Raymond Garcia mipadayag sa iyang kabalaka kay basin makalapas sila sa kamandoan sa korte nga nagpasirado na gyud sa maong landfill.

“I was alarmed and back hold that the committee report did not mention about the Court of Appeals decision, the Writ of Kalikasan wherein the decision is peculiar to that Inayawan landfill considering that this is committee on laws report it should have at least touched the decision so that also other committees will be guided as to the course of action it would take in the future,” sigon ni Garcia.

Apan si Andales nagtuo nga nasubay kini sa balaod kay kabahin kini sa pagsunod sa rehabilitasyon sa landfill ug aduna pa hinuoy final deliberation kabahin niini. Una niini, si Gabuya ni-sponsor sa pag-establisar og MRF kay nakita niya nga ang MRF epektibong pamaagi paghipos sa mga toneladang basura sa siyudad ug mao usab kini ang gimando sa Section 32 sa Republic Act 9003 kun Solid Waste Management Act nga kinahanglang adunay MRFs ang Local Government Units. Anha sa MRF klaruhon ang pagbahig sa mga basura gikan sa malata o mabaho, paperboard, kahoy, plastic, construction demolition waste, textile, rubber ug uban pa aron dili tanan malabay kay ang uban niini mahimo pang ma-recycle. - /IBM) (BANAT NEWS)