Atop sa motor gustong ipa-ban
CEBU, Philippines — Gitun-an karon sa Committee on Laws, Ordinances and Styling ang ordinansahon nga nagdili sa paggamit og ‘detachable motorbike roof’ o kanang nauso nga atop-atop sa mga motorsiklo nga proteksyon sa init sa adlaw ug sa hinay nga uwan.
Kini human si Konsehal Pastor Alcover Jr. sa Barug Team Rama mi-sponsor og ordinansahon nga “ an ordinance banning motorcycle canopies and other similar accessories thereof, and prescribing penalties for violations thereof.”
Niadtong Nobiyembre 7 ning tuiga giduso ang gisugyot nga ordinansahon ngadto sa Committee on Laws, Ordinances and Styling aron masusi kon kini nasubay sa rule of law.
Ang rason ni Alcover delikado kuno sa disgrasya sa kadalanan ang maong atop-atop. Tinguha sa maong ordinansahon nga mapugngan ang bisan unsa nga aksidente sa motorsiklo gumikan niining ‘detachable motorbike roof’ nga ginama sa nipis nga panapton.
Sigon ni Alcover ubos sa Section 16 sa Republic Act 7610 kun Local Government Code nga naglatid nga tanang Local Government Units giingong dunay katungod sa pag-umol og balaod alang sa kaayuhan sa publiko.
Dunay penalty nga ipahamtang sab sa maong ordinansahon alang sa mga makalapas niini. Alang sa unang kalapasan makabayad og P500, P1,000 sa second offense ug P2,000 ug pagkompiska sa ‘detachable motorbike roof’ sa ikatulong kalapasan. Ang maong atop-atop mapalit sa kantidad nga P400 ngadto sa P450.
Kon kini ma-aprubahan na sa Konseho ang Office of the Mayor pinaagi sa Cebu City Transportation Office (CCTO) ang tahasan pagpatuman niini.
Sa iyang bahin ang Operations Head sa CCTO Francisco Ouano mihatag og komento labot sa maong ordinansahon.
“In behalf sa CCTO, ang safety para sa motorists mao gyud na atong unahon, if makita nga peligro mangita siguro ‘ta og paagi aron dili na mameligro. Dili lang siguro i-ban dayon nato kay gamit man sad gud na sa mga drivers,” matud ni Ouano. - /IBM) (BANAT NEWS)
- Latest
