Duha gipamusil, usa patay

CEBU, Philippines — Duha ka mga lalaki ang gipamusil sa managlahing higayon didto sa Barangay Ermita ug sa Guadalupe, Dakbayan sa Sugbo niadtong Sabado sa gabii ug Domingo sa buntag.

Sa Sitio Kanaas Riverside Banawa, Barangay Guadalupe, alas-6 sa buntag niadtong Domingo giunay pagpusil sa iyang silingan ang usa ka Rogen Canape ,35, residente sa maong lugar  apan lumad nga taga Barangay Mangyan, lungsod sa Sibonga.

Sumala pa sa hepe sa Guadalupe Police Station Senior Insp. Henry Orbiso, mitug-an ang suspek nga si Glenn Cardente nga aduna na sila’y karaang bikil sa biktima.

Matud ni Orbiso, ang suspek nangangkon nga igo ra siyang midepensa sa iyang kaugalingon pinaagi sa pag-una niya og pusil niini kay hadlok siyang maoy maunhan. Gipusil sa suspek ang biktima upat ka higayon hinungdan sa kamatayon niini.

Samtang sa dalan F. Calderon, Barangay Ermita, naangol ang biktima nga si Danie Pais, 34, taga Barangay Luz ning dakbayan.

Matud pa sa Homicide Section sa Cebu City Police Office nga samtang naglakaw paingon sa giabangang lawak sa iyang suod nga higala sa maong barangay nakasugat niini ang usa ka giila lang sa pangalang “Stanley” ug dayon gipusil siya upat ka higayon.

Nakaangkon ang biktma og samad pinusilan sa iyang tuong dughan ug sa buko-buko ug dihadiha midagan palayo ang suspek samtang gitabangan sa mga tawo nga madala sa tambalanan ang biktima. - /IBM) (BANAT NEWS)