Patay sa hit and run

CEBU, Philippines — Patay ang usa ka 42-anyos nga security guard sa usa ka pampublikong tunghaan human kini nabanggaan sa nagsunod nga pasaheroang jeep  diha sa dalan Katipunan, Barangay Labangon niining Dakbayan sa Sugbo.

Ang nakalas giila nga si Emmanuel Gelig, usa ka guwardiya ug kanhi sakop sa City Traffic Office Management nga karon mao na ang City Traffic Office sa siyudad sa Sugbo.

Si PO2 Paul Dennis Traya, imbestigador sa Cebu City Traffic Group miingon nga nagmaneho sa iyang motorsiklo ang biktima gikan duty padulong na unta mouli didto sa dalan Salvador sa maong barangay.

Apan adunay usa ka 12C nga rotang jeep pasaheroan nga pwerteng kusoga og padagan nga nakasaghid kaniya hinungdan sa pagkatumba niini ug nalatayan sa uwahing ligid sa maong jeep.

Human sa hitabo imbes nga mohunong mipasirit hinuon og maayo ang drayber palayo ug gibiyaan ang biktima nga nagbuy-od sa kalsada.

Daling miresponde ang Basak Pardo Emergency Rescue ug gidala sa tambalanan ang biktima apan gideklarar kining dead on arrival.

“Posible nga padulong na ‘to garahe ang drayber kay kung naa toy onboard, impossible nga di mangreklamo di ba?.” matud pa sa maong imbestigador.

Niining pagsuwat sa balita padayon pang gisubay sa kapolisan ang mga closed-circuit television cameras diha sa mga establisamento sa maong dalan aron masubay kon kinsa ni nga itom or dark colored nga jeep pasaheroang miagi sa maong dapit nianang mga orasa. Giawhag usab sa maong polis ang kadtong uban pang nakakita sa maong hitabo ug nakaklaro sa plaka sa maong sakyanan nga i-report kanila aron nga mahatagan og hustisya ang kamatayon ni Gelig.

Samtang talandugon ang kahimtang sa usa ka lalaki ug naangol ang laing lima human nga ang ilang mga gisakyang motorsiklo nagkasungag diha sa Barangay Don Gregorio Antigua, Lungsod sa Borbon. Si Police Officer 2 Ernesto Pablo sa Borbon Police Station miila sa biktima nga anaa sa kritikal ang kahimtang mao si Benjie Menchavez Sarvida, 20, taga Bungayon sa maong lungsod nga gikan sa Dakbayan sa Sugbo.

Ang iyang mga angkas nga pulos usab naangol mao sila si Kiven Bongo Dosdos, 19 ug Masie Armero Casas, 22.

Samtang ang nakasungag niini mao ang laing motorsiklo nga gimaneho og 17- anyos nga adunay angkas nga si Alvin Bamboa, 22, nga gikan pa sa dakbayan sa Bogo. Matud pa ni Pablo pulos kusog ang dagan sa motorsiklo ug wala na makalihay dihang nagkasugat diha sa maong dapit.

Ang mga biktima gidala sa Don Dosado Memorial Hospital sa Barangay Dumlog sa Lungsod sa Sogod. - /IBM) (BANAT NEWS)