Batan-ong mag-uuma nagnihit

CEBU, Philippines — Napanglantawan sa kagamhanan sa Probinsiya sa Sugbo ang problema sa kakuwang unya sa mga batan-on nga mananagat ug mag-uuma.

Kini human mga edaran na ang nisalmot ug nakahuman sa Farmers Scientist Training Program (FSTP), usa ka programa sa Kapitolyo ubos sa Provincial Agriculture Office sa paghatag og trainings sa fundamental ug basic nga pamaagi sa pagpanguma.

Matud ni Bokal Christopher Baricuatro, chairman sa committee on social service ug education sa Provincial Board, nga dako kining problema sa probinsiya kay kung mangretiro na o kung mangamatay na ang mga tiguwang, wala nay mopuli nga mga batan-on nga nakat-on ug na-enrol sa FSTP.

Ang maong obserbasyon nakita sab sa hepe sa PAO, Roldan Saragena, apan matud niya nga daghan sab kini og inter-related nga mga factors nga naingon niini ang sitwasyon.

Sumala pa sab ni Bokal Miguel Antonio Magpale, chairman sa committee on youth and sports development, nga nagtuo ang mga batan-on nga walay kwarta ug kaugmaon sa pagpanguma mao nga kasagaran maninguha og eskwela ug mokuha og laing kurso sama og molarga sa gawas.

Apan matud ni Saragena nga adunay libreng tuition sa kurso nga agrikultura sa mga technological universities apan gamay ra gihapon ang mo-enrol.

Usa sa mga plano ni Magpale ang paghimo og programa nga magdasig sa mga batan-on sa pagpanguma subay sab sa kasamtangang  Paglaum Scholarship Program sa probinsiya.

Gisugyot sab ni Baricuatro ang pagpagawas og advertisement diin makita ang importansiya ug estorya sa mga pamilya nga malampuson sa ilang kinabuhi tungod sa pagpanguma.

Mapasalamaton si Saragena nga nahisgutan kini nga problema aron makakuha sila og opinyon ug sugyot gikan sa mga magbabalaud sa probinsiya kung unsaon kini pagsulbad. (BANAT NEWS)