Banat ( Leaderboard Top ), pagematch: 1, sectionmatch: 1

P5.7M marijuana gipang-ibot

CEBU, Philippines — Mokabat sa P5.7 milyones nga kantidad sa dagkong punoan sa marijuana ang naibot sa kapolisan gikan sa duha ka plantasyon sa hiniusang pagpangronda sa mga awtoridad sa duha ka bukirang barangay sa Dakbayan sa Danao.

Si Chief Inspector Geralde Ace Perale, hepe sa Danao City Police Station, maoy nangulo sa pagpangronda nga niresulta sa pagkasikop sa usa ka tawo.

Giila ang nadakpan nga si Reynaldo Cal kinsa aktong nag-atiman sa gitanom nga marijuana sa Barangay Sibacan ala una sa hapon niadtong Miyerkules.

Naibot ang 12,000 ka dagkong punoan sa marijuana nga gisunog sa mga awtoridad didto sa maong dapit.

Samtang naibot sab ang 8,925 ka dagkong punoan sa marijuana sa silingang Barangay Togonon.

Ang tig-atiman niini naila lang sa pangan nga Julito Batucan.

Matud ni Leia Albiar, tigpamaba sa Philippine Drug Enforcement Agency-7, nga lisud ang gitamnan sa maong marijuana sanglit molakaw sila og dul-an sa 30-minutos ug nahimutang sa bakilid nga lugar.

Dugang ni Albiar nga pasakaan nila og kaso ang nagtanum sa maong mga marijuana. (BANAT NEWS)

  • Follow Us: