Banat ( Leaderboard Top ), pagematch: 1, sectionmatch: 1

PCSO hayan ikiha sa usa ka kompaniya

CEBU, Philippines — Ang Philippine Charity Sweepstakes Office hayan mag-atubang og reklamo gikan sa usa ka Filipino gaming technology company nga nag-operate og online numbers game kay ang ilang mga outlets dinhi sa Sugbo ug ubang bahin sa nasud gipangsirad-an sa PCSO.

Si Atty. Bryan Pelandos, sakop sa legal office sa Globaltech Mobile Online Corporation, nangangkon nga legal ang ilang pag-operate og mga online booking outlets nga ang katawhan makapalit og kombinasyon sa numero alang sa swertres.

Matud ni Pelandos nga ang ilang kompaniya gihatagan og pagtugot sa PCSO aron maka-operate og online numbers game booking outlets sa lainlaing bahin sa nasud sukad kaniadtong Abril 2014.

Ang PCSO nakigkontrata sa Globaltech Mobile Online Corporation aron nga masanta niini ang grabeng pagkuyanap sa mga illegal swertres sa lainlaing dapit sa nasud, apil na dinhi sa Sugbo.

Apan adunay grupo nga namasangil nga ang maong kompaniya pantalya lang sa illegal numbers game nga jueteng didto sa Luzon, ug sa illegal swertres dinhi sa Kabisay-an.

Si Atty. Pelandos nagkanayon nga dili tinuod ang maong pamasangil batok sa ilang kompaniya ug nag-andam gani sila karon og kasong libelo sa mga tawo nga nagpaluyo sa binayran nga advertisement sa mantalaan nga nagdaot sa ilang kadungganan.

Matud sa abogado nga moduso sila og reklamo ngadto sa PCSO kabahin sa pagsirado nila sa mga booking outlets, apil na diha sa Mandaue ug pipila ka dapit dinhi sa Metro Cebu.Wala dayon mahibaw-i kun pila ka booking outlets sa Globaltech nga nasirad-an sa PCSO dinhi sa Sugbo. (BANAT NEWS)

  • Follow Us: