Banat ( Leaderboard Top ), pagematch: 1, sectionmatch: 1

Mangrakrak naunhan

CEBU, Philippines — Rapidohon na sab unta sa ikaupat nga higayon ang Talisay City Jail kagahapon sa alas-2 sa kaadlawon apan gidemalas ang duha ka suspek nga nagsakay og motorsiklo tungod kay sila maoy naunhan sa mga sakop sa Bureau of Jail Management and Penology (BJMP) apan nakaikyas gihapon.

Sa gihimong follow-up operation naabtan sila si Joseph Troy Briones, 19, taga Barangay Lagtang diha sa maong tambalanan human naigo sa iyang abaga. Wala siya magdugay gibalhin dayun kini sa Don Vicente Sotto Memorial Medical Center.

Samtang ang kuyog ni Briones ang nailhan nga si Arjann Ababon Bacus, 22, taga Barangay Lawaan 3 naigo sa iyang suwang ug didto na naabtan sa Minglanilla District Hospital ug gibalhin sa Miller Hospital dayun lahos sa Don Vicente Sotto Memorial Medical Center.

Si Supt. Gil Inopia, warden sa Talisay City Jail nibutyag nga naabot gyud ang demalas sa mga suspek ug sila na gyud ang napusilan.

Ang maong prisohan makatulo ka higayun nga girakrakan sugod pa niadtong bulan sa Hunyo ug tungod niadto gipalig-on ang depensa sa prisohan ug gipabutangan og sandbags, nagbutang usab og duha ka humps sa atubangan ug  nagmuntar og closed-circuit television cameras.

Ang suway pagpamusil nakuhaan gyud og footage nga nagpakita kanila nga nagsakay og motorsiklo ug ang usa nibunot og armas ug gition kini ngadto sa gate apan wala nibuto ang armas, sunod nga nahitabo nagkarakara ang duha pagsibat apan tungod sa hump wala kini nakadagan dayon palayo.

Sunod nga nakita nga natagak sa motor ang angkas apil ang armas, cellphone ug tsinelas ug gibiyaan sa kauban apan pag-abot sa unahan nangatumba silang duha kay pareho na diay nangaigo. Matud pa nga nabantayan nang daan sa mga guwardiya ang pag-agi sa motor nga kalit mi-U Turn.  Pagbalik sa tungod nibunot ang angkas og armas apan wala nakabuto ug nangaunhan silang duha.

Nakahigayon pa og dagan ang mga suspek bisan samdan ug nakasakay og laing motorsiklo dayon lahos sa Talisay City District Hospital. Si Inopia nibutyag nga si Bacus nabilanggo na sa ilang buhatan niadtong Abril 7, 2015 gumikan sa kasong paghupot og ilegal nga armas unya nakagawas kini niadtong Enero 24 ning tuiga.

Si SPO2 Yvonne Ilustrisimo sa Talisay City Police Station nagkanayon nga ang duha ka suspek ang nalambigit na sab sa pagpanulis ug mga sakop sa gun-for-hire. Nagtuo si Inopia nga gisugo lang ang duha sa mga tawo nga nasuko kanila gumikan sa ilang estrikto nga pagpatuman sa ilang palisiya.

Nagtuo usab siya nga nasayod ang duha kun kinsa pa ang ubang nangrakrak kaniadto sa TCJ.

Sa laing bahin, giingong top 3 nga most wanted sa Siyudad sa Talisay ang napusilan usab sa mga operatiba sa kapolisan diha sa Sitio Mananga 2, Barangay Tabunok sa maong dakbayan.

Ang nasamdan naila nga si Ricky Tan, nagpuyo sa maong dapit, samtang nangasikop ang mga kauban niini nga silang Cesar Taac-Taac, 25, ug si Geoffrey Tabay, 22, pulos nagpuyo sa Sitio Sagingan, Barangay Lawaan 3 sa nahisgutang siyudad.

Si SPO2 Yvonne Ilustrisimo sa Talisay City Police Station nagkanayon nga nihimo sila og follow-up operation labot sa pagpangrakrak sa Talisay City Jail ug may nakatug-an kanila nga didto sa maong lugar nitago ang usa sa mga suspek sa pagpangrakrak. Apan sa pagsulod sa mga operatiba hayan nisugat kanila ang grupo ni Tan nga pulos armado ug nition sa iyang KG-9 submachine pistol apan naunhan kini pagpusil sa mga polis.

Naigo sa iyang hawak si Tan ug nalagpot iyang armas, ang mga kuyog ni Tan wala na moatraka pa kay mas daghang pulis ang nakatutok na sa ilang mga armas ngadto  kanila. Nakuhaan si Tan og KG-9 nga armas nga aduna’y 16 ka  bala samtang .22 nga revolver ang nakuha gikan sa duha ka kuyog niini.

Asoy pa ni Ilustrisimo nga aduna’y warrant of arrest si Tan gumikan sa kasong murder ug kawat hinungdan nga nabutang kini sa ilang top 3 most wanted sa ilang buhatan. (BANAT NEWS)

  • Follow Us: