Banat ( Leaderboard Top ), pagematch: 1, sectionmatch: 1

Kapolisan motabang sa trapik sa Pasko

Gipahibawo sab ni Chief Supt. Jose Mario Espino nga aduna sab silay ilusad nga bag-ong proyekto nga gitawag og “Discipline Zone” diin gimanduan niya ang mga hepe sa mga estasyon sa kapolisan nga magpili og usa ka lugar nga ilang tutukan. Philstar.com/File

CEBU, Philippines — Motabang ang kapolisan sa pagsulbad sa problema sa trapiko sa Dakbayan sa Sugbo sa nagkaduol nga Pasko.

Ang direktor sa Police Regional Office-7, Chief Supt. Jose Mario Espino, niingon nga nangandam na ang kapolisan sa grabe nga paghuot sa trapiko gumikan sa nagkaduol nga Pasko.

Makig-alayon siya sa lainlaing sektor sa gobiyerno nga nag-atiman sa dagan sa trapiko.

Gipahibawo sab ni Espino nga aduna sab silay ilusad nga bag-ong proyekto nga gitawag og “Discipline Zone” diin gimanduan niya ang mga hepe sa mga estasyon sa kapolisan nga magpili og usa ka lugar nga ilang tutukan.

Matud ni Espino nga seguraduhon nga walay ilegal nga mamaligyaay sa dalan, walay magpalimos ug walay paghuot sa dagan sa trapiko.

Sugdan kini nila sa kadalanan sa Apas ug Lahug area ug sa Fuente Osmeña Rotunda.

Samtang sugod sa Lunes lauman na sa mga sumasakay ug mga motorista ang kahuot sa dagan sa trapiko sa Natalio Bacalso Avenue ug F. Llamas Street tungod kay ang kontraktor sa P638 million nga underpass project magsugod na pagtrabaho sa phase 1 nga unang gikatakda kagahapon nga sugdan.

Apan nakahukom ang kagamhanan sa Siyudad sa Sugbo nga mohimo og dry run karong adlawa ug sa Domingo aron pagsusi sa traffic situation sa mga lugar nga maapektuhan.

Kini atol sa meeting nga gipahigayon sa buhatan ni Konsehal Dave Tumulak, chairman sa committee on public order and safety kagahapon sa buntag.

Ipakatap ang mga traffic enforcers ug mangunay sab sa pagsusi ang operations head sa Cebu City Transportation Office nga si Francisco Ouano.

Atol sa meeting giila ang mga diversion routes nga makatabang pag-decongest sa traffic.

Ang tanang jeepneys gikan sa south mo-left turn sa J. Tabura paingon sa Sabellano Street, right turn sa Macopa Street, right turn sa J. Jumalon Street gawas sa N. Bacalso Avenue.

Tanang sakyanan padulong sa P. del Rosario moagi straight sa N. Bacalso ug ang tanang sakyanan padulong sa South Road Properties mo-right turn sa may Cabreros Street, left turn sa Rizal Avenue Extension deretso sa Vestil Street SRP.

Giawhag ang publiko nga likayan ang pag-park sa mga gitumbok nga mga diversion road aron dili kini makamugna og kahuot sa dagan sa trapiko ug aron dili i-clamp sa CCTO ang ilang mga sakyanan. Ang mga bus, mini bus ug trak adto agi sa SRP.

Nangayo sab ang siyudad sa tabang sa mga barangay tanod nga motabang sa mga traffic enforcers. (BANAT NEWS)

  • Follow Us: