Kagawad, amahan, anak sikop sa PDEA
CEBU, Philippines — Nasikop ang usa ka konsehal sa buy-bust operation sa mga sakop sa Philippine Drug Enforcement Agency-7 nga gipangulohan ni Regional Director Emerson Margate sa San Jose, Barangay 2, Bais City, Negros Oriental niadtong Lunes sa hapon.
Ang nasikop mao si Dean Brian Acas, 29, konsehal sa Barangay 2, ug usa ka high value target.
Nakuha gikan kang Acas ang tulo ka gagmay nga pakete sa shabu nga motimbang og 5 gramos nga mobalor og P5,000.
Laing operasyon nahitabo sa Sitio Kantibhang, Lower Pakigne, Minglanilla niadtong Martes sa kaadlawon diin usa ka 25-anyos nga lalaki ang nasikop. Ang nasikop naila nga si Arnel Villanueva, walay trabaho ug residente sa maong lugar.
Matud sa tigpamaba sa PDEA-7, Leia Albiar, nga nasikop na kaniadto si Villanueva sa kalambigitan gihapon sa ginadili nga drugas.
Nasakmit gikan kang Villanueva ang 20 gramos nga shabu nga mobalor og usa ka gatos ka libo ka pesos. Laing nasikop sa buy-bust mao ang manag-amahan nga sila si Edwin Zafra, 55, walay trabaho ug subject sa operasyon, ug Julia Nicole Zafra, 20, dalaga ug walay trabaho, sa may A. Lopez Street, Labangon, Dakbayan sa Sugbo.
Nakuha gikan sa manag-amahan ang 30 gramos nga shabu nga mobalor og P150 mil.
Samtang 122 ka pakete sa shabu ang nasakmit sa mga sakop sa PDEA-7 kauban ang kapolisan ug kadagkuan sa Cebu Provincial Detention and Rehabilitation Center sulod sa duha ka selda sa prisohan atol sa greyhound operation.
Gitug-an ni Albiar nga nasakmit ang drugas nga mobalor og P10 mil. (BANAT NEWS)
- Latest
