Mga priso sa Mandaue City Jail gikasal
CEBU, Philippines — Onse ka parisan ang gikasal sa gipahigayong mass wedding nga gipangulohan ni Mayor Luigi Quisumbing kagahapon sa buntag diha sa Mandaue City Jail.
Tinguha sa maong mass wedding mao ang paghatag og inspirasyon sa mga piniriso ug ang kamahinungdanon sa pamilya.
Usa sa mga nakabenepisyo sa mass wedding mao ang manag-uyab nga sila si Rodelito Buenavista ug si Samantha Carrido.
Si Buenavista pito ka tuig nang nabilanggo tungod sa kasong murder giingong human siya naamong sa kasong pagpatay sa iyang higala apan nagpabilin gihapon nga matinud-anon kaniya si Carrido ug kanunay kining moduaw kaniya diha sa prisohan matag tingbisita.
Malaumon si Buenavista, nga hingpit na niyang makauban ang iyang kapikas sa kinabuhi gawas sa prisohan karong panahon sa pasko.
Si Buenavista kauban sa iyang asawa usa sa onse ka parisan nga nakabenepisyo sa programa sa Mandaue City Jail, Mandaue City Government ug sa Junior Chamber International (JCI) Womandauehanon.
Matud pa ni incoming Mandaue City Jail Warden Superintendent Jessie Calumpang nga ang kasal naghatag kini og kahigayonan sa mga binilanggo bisan sa ilang kahimtang padayon sila nga nahigugma ug maghatag usab kini og inspirasyon sa anaa diha sa mga bilanggoan nga hingpit silang magbag-o alang sa kaayohan sa ilang pamilya. (BDB) (BANATNEWS)
- Latest
