‘Serial rapist’ nasikop, MCPO gipasidunggan
CEBU, Philippines — Gidayeg ni Mandaue City Mayor Gabriel Luis “Luigi” Quisumbing ang Mandaue City Police Office (MCPO) sa pagkasikop sa serial rapist pinaagi sa security checkpoint sa Barangay Canduman.
Una niyang gipasidunggan si Senior Superintendent Roberto Alanas, ang MCPO director ug ang tanan niyang gisakopan.
Matud ni Quisumbing nga usa ka dakong kalampusan ang nahimo sa kapolisan aron magpabilin nga luwas ang siyudad.
Ang suspek nga si Reil Yamit Ceniza, taga Zone 4, Barangay Mantuyong, nasikop ala 1:45 sa kaadlawon niadtong Huwebes sa mga sakop sa MCPO - Station 6 bisan nisuway kini og likay sa checkpoint.
Gisundan sa kapolisan ang nahimo nga krimen ni Ceniza human usa ka babaye ang nisumbong nga siya giamong-amongan sa suspek.
Laing walo pa ka biktima ang niila kang Ceniza nga nakahimo sa susamang krimen.
Si Ceniza gitanggong na sa holding cell sa MCPO-Station 6 gumikan sa ilegal nga paghupot og drugas ug armas human ang kapolisan nakasakmit gikan kaniya og usa ka medium-sized sa shabu ug usa ka .9mm pistol atol sa checkpoint.
Kasong kalapasan sa Republic Act (RA) 4136 o ang Land Transportation and Traffic Code, RA 10591 o ang Illegal Possession of Firearms, ug Section 11 (possession) sa RA 9165 o ang Comprehensive Dangerous Drugs Act of 2002 ang isang-at sa kapolisan batok sa suspek.
Giawhag ni Quisumbing ang mga badlungon nga mobiktima sa mga inosente nga dili sila hunongan sa pagpangita kung makahimo og krimen.
“Prosperity, inclusion and equality but the first step to any plans is safety. For those that prey on the innocent rest assured, we will find you,” matud ni Quisumbing. (The Freeman/GMR)
- Latest
