P1B gamiton paglimpyo sa mga sapa

CEBU, Philippines — Gipaabot nga i-implementar sa Department of Public Works and Highways (DPWH)-7 ang P1.1 billion nga dredging, de-silting ug de-clogging project sa Siyudad sa Sugbo sa dili pa mahuman ang tuig karon o kaha sayo sunod tuig.

Matud ni Konsehal Jerry Guardo, Deputy Mayor for Infrastructure kinsa nakigtagbo kagahapon sa DPWH-7, Department of Engineering and Public Works ug uban pa. Ang maong budget ubos sa 2016 ug 2017 budget sa Department of Public Works and Highways ug nangita na sila og kontraktor nga maoy mohupot sa maong proyekto.

Dugang ni Guardo sa dili pa ipatuman ang maong proyekto atimanon usab ang mga informal settlers nga maapektuhan hinungdan nga dunay gitagana nga pundo alang nila nga moabot sa P140 million.

“This fund is coming from DPWH not from the City ang P140 million, mao ni atong gipangayo sa DPWH para mabalhin diri sa city unya ang city government kami nay mo-implement para pag-accommodate sa mga informal settlers, mapangitaan nato og relocation site mabalhin nato sila para smooth ang ilahang pag-implement sa flood control projects,” sigon ni Guardo.

Upat ka sapa ang gipaabot nga limpyohan ug palawman nga mao ang Mahiga, Tejero, usa sa South District ug usa sa dakbayan sa Mandaue nga i-dredge, tangtangan og bara ug ayuhon sab ang riprap. Nasayran nga nangita og mapa ang konsehal aron makita ang mga kanal sa siyudad  aron makita kun asa ang barado ug iprayoridad sa Quick Response Team nga planong umulon aron paglimpyo niini. (BANAT NEWS)