Gidunggab patay sa umagad
CEBU, Philippines — Napalgan na lang nga patay na ang 63-anyos nga babaye nga adunay samad dinunggaban sulod sa iyang panimalay sa Palanas, Lungsod sa Alcantara niadtong Domingo sa hapon.
Ang biktima giila nga si Manuela Villacis, residente sa maong lugar, samtang ang gitudlong suspek sa krimen mao ang umagad ra sab sa biktima nga si Arnel Nimeada, 43-anyos.
Sumala pa ni PO2 Edward Sagon sa Alcantara Police Station nga sa imbestigasyon nasuta nga nag-inusara ra nga nagpuyo sa maong balay ang ginang.
Niadtong Domingo matud pa nga giadto sa maong panimalay si Villacis sa iyang anak nga lalaki diin nakit-an niya si Nimeada nga nigawas gikan sa maong balay.
Dihang gisulod sa anak ang panimalay sa iyang inahan, matud pa nga napalgan kining nagkadugo tungod sa mga samad dinunggaban sa iyang aping ug tangkugo.
Dali nga gidala sa tambalanan ang biktima sa pagpamasin nga masalbar pa apan gideklarar kini nga dead on arrival.
Laing nasuta sa inisyal nga imbestigasyon mao nga adunay kalagot ang suspek sa biktima tungod kay babag kini sa relasyon niini sa iyang anak nga babaye tungod sab kay mangulata kini.
Giklaro sa polis nga dili kasado ang anak sa biktima ngadto sa suspek hinungdan nga dali ra silang nagkabuwag. (BANAT NEWS)
- Latest