Talisay City PS hatagan og sakyanan sa siyudad

CEBU, Philippines — Gilaumang mahatag na sa kagamhanan sa Siyudad sa Talisay ang duha ka sakyanan nga gipangayo sa kapolisan aron ilang magamit sa inadlaw nga gimbuhaton.

Kini maoy gipasalig ni Mayor Eduardo Gullas ngadto ni Supt. Jason Villamater, hepe sa kapolisan sa dakbayan.

Matud ni Gullas nga posible karong buwana ilang mapalit ang gipangayo sa kapolisan aron ila pang mahatag ang nindot nga serbisyo ngadto sa mga Talisaynon.

Si Gullas nitataw nga niadtong niaging semana ila nang gisugdan sa pag-canvass sa mga sakyanan.

Asoy pa niya nga adunay igong pundo ang siyudad sa paghatag sa hangyo sa kapolisan.

Sa paglingkod isip hepe ni Villamater sa kapolisan sa Talisay, ang patrol car ug ang walay marka nga sakyanan ang iyang nakita nga kuwang sa ilang buhatan.

Wala sab gilimod ni Gullas nga iyang gisaaran si Villamater sa hangyo niini tungod kay naa man ang iyang suporta ngadto sa kapolisan.

Si Atty. Rudelyn Navarro, city administrator, niingon nga tinguha nila nga makakita og sakyanan nga mahimong patrol car nga adunay kantidad nga P800 mil aron dali ra dayon kining mapalit ug mahatag sa kapolisan.

Si Villamater ang nihangyo og duha ka patrol cars ug usa ka unmarked vehicle apan duha lang ang gisanong ni Gullas. (BANAT NEWS)