Kapolisan nanghatag og leaflets sa kalag-kalag

CEBU, Philippines — Mangapod-apod ang Regional Public Community Relations sa Police Regional Office-7 og mga leaflets alang sa paglikay sa krimen ug disgrasya sa panahon sa Kalag-kalag.

Ang regional director sa PRO-7 nga si Chief Supt. Jose Mario Espino nibutyag nga ilang iisa ang kapolisan sa heightened alert status usa ka semana sa dili pa ang okasyon.

Matud ni Senior Supt. Renato Dugan, hepe sa RPCR, nga naghimo sila og tinagalog ug binisaya sa maong leaflets diin nagpahinumdum sa publiko sa pagseguro nga nakakandado og tarung ang panimalay usa pa mobiya.

Kun magdala og sakyanan sa pagbisita sa mga lubnganan, seguraduhong i-check ang sakyanan kun wala bay depekto.

Laing pahinumdum mao ang mga angay ug dili angay'ng dalhon sulod sa sementeryo.

Anaa sab sa leaflets ang mga numero sa kapolisan kun adunay emergency.

Matud sa hepe sa Regional Operations and Plans Division nga si Supt. Julian Entoma nga mokabat sa 3,430 ka polis ang ipakatap sa tibuok Central Visayas alang sa seguridad sa umaabot nga Kalag-kalag. (BANAT NEWS)