Chong Hua nangayo og pasaylo

CEBU, Philippines — Nangayo og pasaylo ang Chong Hua Hospital sa kapolisan sa wala pagdawat sa usa ka polis nga nasamdan sa operasyon tungod kay walay ika-down sa bayranan nga P10,000.

Si Police Regional Office-7 Director, Chief Supt. Jose Mario Espino, nibutyag nga nitubag na ang tagdumala sa maong tambalanan sa ilang gipadala nga suwat reklamo.

Nireklamo ang PRO-7 sa pagbalibad sa tambalanan kang PO3 David Naraja human napusili ni nga walay downpayment nga 10 mil.

Nasayran nga mipadala og letter of complaint ang PRO-7 human gibalibaran si Naraja.

Si Naraja napusilan ni Jessie Largo atol sa gipahigayong hot pursuit operation sa mga sakop sa Regional Special Operations Group (RSOG) batok kaniya sa Dakbayan sa Talisay niadtong Oktubre 16 niining tuiga diin ang maong suspek ang napatay sab sa kapolisan.

Matud sa kadagkuan sa tambalanan nga nihimo sila og imbestigasyon kabahin sa maong insidente ug nasuta nga walay nalapas nga Anti-Hospital Deposit Law tungod kay matud pa gihatagan nila og pagtagad ang maong polis.

Ilang gipasabot nga ang gipapangayo nga salapi sa ilang admitting staff bayad kini sa kuhaong lawak diin i-admit ang maong polis ug dili bayad alang sa serbisyo.

Human giingong gibalibaran si Naraja, gibalhin siya sa Cebu Doctors University Hospital diin gilibre pa hinoon ang tanang bayranan.

Nitanyag pa ang CDUH nga motabang sa mga polis nga mapagan atol sa operasyon.

Gibutyag ni Espino nga andam sila makigtagbo sa tagdumala sa CHH apan dili kini makapugong sa legal service officer sa PRO-7 nga tun-an kun unsay sunod nga angay buhaton.

"We are open to that. Lahat naman ng problema napapag-usapan," matud ni Espino. (BANAT NEWS)