Pederalismo maoy gihuwat ni Digong

CEBU, Philippines — Andam manaug sa gahum si Presidente Rodrigo Duterte sa higayon nga ang bag-ong Konstitusiyon mahimutang na og klaro alang sa federal form sa panggobiyerno.

Kini ang iyang gibutyag atubangan sa mga dagkong opisyal sa simbahan sa Archdiocese of Cebu ug sa katawhan atol sa iyang pagbisita sa haya ni anhing Ricardo Cardinal Vidal sa Cebu Metropolitan Cathedral.

Matud ni Duterte nga gikan sa transitional government ngadto na sa federal system tinguha niya nga mahitabo karong tuiga o sa sunod tuig,

Sumala pa ni Duterte nga aron walay masulti ang mga tawo nga magdugay ug dili siya mohawa sa pwesto, iyang pasalig ilabi na anaa siya sulod sa simbahan ug dili mahimong mamakak kay basin naminaw si Cardinal, nga basta ma-perfect na ang Konstitusiyon ug mahusto gyud, mangayo siya og pipila ka buwan moretiro na gyud siya sa pagka-presidente.

Dugang ni Duterte nga isip usa ka Sugbuanon, nisaad siya atubangan sa haya sa cardinal nga kung ma-perfect lang niya sunod tuig o kaha sunod adlaw mohawa siya ug dili na siya mag-presidente.

Awhag ni Duterte sa katawhan nga dili motoo sa mga pamolitika.

Gitug-an ni Duterte nga iyang tinguha karon ang pag-restructure sa sistema ngadto na sa federal tungod sa kadako sa inequality sa mga probinsya ilabi na sa Mindanao diin gamay ra sila og madawat nga proyekto.

Ang Presidente nitug-an nga wala nay lain nga pamaagi kung dili ang pag-usab ra gyud ngadto sa federal aron makaangkon og kalinaw sa Mindanao.

Sulod sa 15-minutos nga pagpakighinabi sa Presidente sulod sa simbahan wala gyud kini nigamit og mga balikas bisan og naghisgut kini og mga isyu sama sa drugas ug terorismo.

Gitug-an sa Presidente ang iyang mga saad atubangan sa mga  Sugbuanon tungod kay dako ang iyang pagtuo nga gisaligan siya niini ilabi na kanhi siya residente sa Danao City.

Giangkon sa Presidente nga wala na siyay lain pangitaon pa tungod kay humana siya sa politika sulod sa 23 ka tuig na siya nagserbisyo sa katawhan. (BANAT NEWS)