24 Obispo mohatud kang Vidal

CEBU, Philippines — Moabot 24 ka Obispo ang mohatud kang Archbishop Emeritus Ricardo Cardinal Vidal sa paglubong niini karong adlaw nga Huwebes.

Gitug-an ni Fr. Mhar Vincent Balili, ang kura paruko sa Archdiocesan Shrine of San Roque Mambaling ug usa sa mga gitahasan alang sa pagpadagan sa liturgical activities atol sa adlaw sa lubong. Ang Apostolic Nuncio nga si Most. Rev. Gabriele Giordano Caccia, ang naa sa gawas sa nasud hinungdan mopadala siya sa iyang representante nga si Msgr. Gabriele Viola.

Mga kanhi nahimong alagad ni Cardinal Vidal nga gitahasan sa mga kalihokan mao sila si Msgr. Dennis Villarojo, DD isip homilist, samtang si Rev. Msgr. Guillermo Gorre, Msgr. Arthur Navales, Msgr. Alfredo Romanillos ug Msgr. Vicente Tupas maoy modala sa Funeral Pall Bearers, Juanito Vidal sa Cross.

Samtang ang moaswat sa lungon ni Vidal mao sila si Msgr. Rey Penagunda, Msgr. Danilo Sanico, mga Vicar General sa Archdiocese of Cebu, Msgr. Achilles Dakay, Media Liaison Officer panahon ni Vidal, Msgr. Joseph Tan, Economous, Msgr. Agustin Ancajas, Private Secretary, Msgr. Roberto Alesna, Vicar general, Msgr. Adelito Abella, chancellor, Fr. Joseph de Aquino, Secretary ni Vidal, Fr. Expedito Torrevillas, Master of Ceremony ug Msgr. Ildebrando Leyson, kanhi Rector Archdiocesan Shrine of San Pedro Calungsod.

Kagahapong adlawa, gipakita ngadto sa media ang lubngan kang Vidal nga gipabarog kaniadtong tuig 1983 ni His Eminence Julio Cardinal Rosales nga maoy gipulihan ni Vidal.

Gitug-an ni Engr. Norevic Laroa, in- house Enginer sa Cebu Metropolitan Cathedral nga 18 ka tawo ang motrabaho sa mausoleum nga lubngan ni Vidal ug 24 oras nila kining trabahoon ug 90 porsiyento nang nahuman.

Si Presidente Rodrigo Duterte nideklarar nga holiday sa tibuok probinsya sa Sugbo karon adlaw nga Huwebes aron sa paghatag og kahigayonan sa mga Sugbuanon nga makayukbo sa katapusan nga higayon kang Vidal.

Si Duterte hilom nga niduaw kang Vidal sa miaging gabii gikan mitambong sa Bacolod City Maskara Festival.

Siya gisugat ni Cebu Archbishop Jose Palma, Msgr. Ruben Labajo, ug pipila ka mga kaparian sa Archdiocese of Cebu, pamilya sa nitaliwan nga Cardinal ug sa bagang duot sa mga Sugbuanon nga nagbilar.

Si Duterte mihulagway sa cardinal nga usa ka mapahiubsanon ug mga pulong nga mogawas gikan sa baba niini nagsabwag og gugma ug wala siya makadungog nga kini nangasaba.

Sumala pa ni Duterte Sugbuanon usab siya kansang kagikan taga Danao ug siya usa ka Romano Katoliko nga sama sa uban nasubo siya sa kamatayon sa cardinal.

Si Archbishop Jose Palma, nipadangat sa iyang kahinangop tungod kay nihatag gayud og panahon ang presidente kang Vidal.

Si Palma, nanghinaut ug nag-ampo alang sa grasya ug giyahan kanunay si Duterte sa pagdumala sa nasud.

Ang nag-inusara nga igsuon ni Vidal nga si Juanito nagpasalamat  kay napagaan sa ilang gibating kaguol ang mga paghulagway para sa iyang maguwang.

Gipahibawo ni PRO7 Regional Director Chief Supt. Jose Mario Espino nga aduna na silay security plan sa paglubong ni Vidal ug usa na niini ang pagpakatap og mga polis sa prosisyon niini. (BANAT NEWS)