Mga residente sa Mandaue ipabahig daan ilang basura

CEBU, Philippines — Isip sa pagpatuman sa Executive Order (EO) 37 ang kagamhanan sa dakbayan sa Mandaue gihigpitan ang pagbantay sa mga sakyanan nga nagkarga og basura diha sa dumpsite sa Barangay Umapad. Ang maong dumpsite permamente kining isirado tungod sa giingong wala mabahig nga mga basura gikan sa malata ug dili malata.

Ang City Environmental and Natural Resources (CENRO) officer sa siyudad, Aracili Barlam mipasabot sa nahisgutang kamanduan ni  Mayor Luigi Quisumbing.  Matud ni Barlam nga nagpadayon karon ang ilang information drive sa mga lumulupyo sa siyudad diin ang kabalayan giawhag sa pagbahig na daan sa  ilang mga basura nga ilabay.

Kini aron dili sila makabayad og multa nga P500 ngadto sa P1,000 sa nahimo nilang kalapasan.

Nunot sa maong kamanduan sa mayor, ang City Solid Waste Management Board (CSWMB) maoy mohimo sa pag-monitor ug sa pag-evaluate sa gipatuman nga pagsirado ug lakip na usab ang rehabilitation sa Umapad controlled dumpsite. (BANAT NEWS)