Babaye nagtan-aw og TV gipusil patay
CEBU, Philippines — Patay ang usa ka babaye nga nagtan-aw lang sa telebisyon diha sulod sa ilang panimalay sa Purok Niyog, Barangay Lawaan, dakbayan sa Danao.
Si Police Officer 2 Thomas Reden Perez sa Danao City Police Station miingon nga mga alas 7:00 pasado ang takna sa milabay’ng Domingo sa gabii nakadawat sila og taho kabahin sa pagpamusil diha sa maong lugar. Ang biktima giila sa kapolisan nga si Alberta Molina, hingkod ang panuigon, minyo nga nagpuyo sa maong dapit.
Matud ni Perez nga ang kahagip-ot ug ang kakuyaw sa maong dapit maoy hinungdan nga Lunes na sa buntag nga gihimo sa kapolisan ang pakisusi. Si Perez miingon duha ka wala hiilhing lalake ang kalit nga misaka sa panimalay sa biktima ug gipusil kini sa makadaghang higayon nga nakaingon sa hinanali niining kamatayon.
Dugang pa ni Perez nga human sa pagpusil ang duha ka suspetsado dali usab nga nakapahilayo sa maong dapit.
Ang kapolisan nagtuo nga adunay personal nga kasuko ang mga suspetsado sa biktima nga maoy hinungdan sa maong pagpamusil. (BANAT NEWS)
- Latest