Matam-is nga Pagbarog ni April

CEBU, Philippines — Wala damha ni April Belyn Miscala, 43 anyos, lumolupyo sa Ramos, Cebu City, nga mapadpad siya sa kalibutan sa “baking” kay sukwahi man kini sa iyahang gi-eskwelahan.

Natawo si April sa Hagonoy, Davao del Sur. Kamanghuran siya sa upat ka managsoon. Pang-uma ang pangita sa iyahang mga ginikanan. Tigbyahe sa bugas humay iyahang inahan ug tig-galing sab iyahang amahan.

Sa nag-edad siya og says anyos, napugos sila pag-anhi sa Cebu human gibihag iyahang inahan sa mga rebeldeng grupo didto sa Davao sulod sa unom ka bulan. Dinhi sa Sugbo, ni-estar sila sa balay sa igsuon sa iyang inahan sa Mandaue sulod sa duha ka tuig. Naninda og prutas iyahang inahan sa merkado aron aduna sila’y panggasto sanglit dili igo ang sweldo sa  iyahang amahan nga nagtrabaho niadtong panahona sa usa ka milling company.

Sa elementarya, maglakaw og duha ka kilometro si April matag adlaw aron makaabot sa tunghaan. Hangtud nga nibalhin siya sa University of the Visayas diin usa siya ka scholar isip sakop sa drum & bugle club. Naningkamot gayud siya hangtud nga nitapos siya og high school.  Sa kolehiyo nikuha siya og associate course nga Radio Operator isip working student.  Alas 6 hangtod alas 11 sa buntag ang duty niya  sa usa ka autoparts company, unya modiretso siya sa iyahang klase hangtod na sa gabii. Mobalik na sab siya og duty sa alas 8 sa gabii aron masirado nga walo ka oras iyahang pagtrabaho.

 “Lisod oy, magdali-dali ka. Ang akong typing Class kay nakadawat ko og 3.0 kay pirme ko ma-late kay 10 am ako klase niya 11:30 akong out,” paghinumdom pa niya, diin ang iyang sweldo nga P2,500 matag semana mao’y gibayad niya sa iyahang matrikula. Kini tungod kay wala nay ikagasto iyahang inahan sa pagtungha sa kolehiyo kay naatol kini nga nagkasakit iyahang amahan.

Bisan nga naglisod siya pagbalanse sa iyahang oras isip working student, nakahuman gyud siya sa gikuhang associate course human sa duha ka tuig.

Pag-graduate niya nagsabak si April sa anak sa iyang kapuyo nga kauban ra sab niya sa trabaho. Nakabaton sila og duha ka mga anak , apan nagbuwag kay wala na nagkasinabot.

Nakakita og nagkalain-laing trabaho si April human nanganak. Hangtud nga nakatrabaho siya isip cashier sa usa ka hotel ug nahibalag niya ang iyang bana karon nga si Daniel Miscala.  Nilungtad og tulo ka tuig isip cashier si April, hangtud nga niundang siya og trabaho kay nakahukom na sila nga magpakasal sa huwes. Nagtinguha sila nga makabaton dayon og anak, apan nahitabo kini, human una sa walo ka tuig.

Hilig sa Baking

Kay gilaay na man siya sa iyahang kinabuhi human nanganak, nakadesider siya nga magkuha og kursong culinary. Nahuman gyud niya ang maong pagtuon apan nakahuna-huna siya nga dili gyud pagluto ang gipangita sa iyahang kasing-kasing, hinungdan nga nikuha siya og baking class. Dinhi na nagsugod ang hilig ni April sa baking sama sa paghimo og cakes ug cupcakes.

Nagsugod siya sa ilahang balay lang ug nidawat og orders ug namaligya pinaagi sa Facebook. Kay nagkakusog man ang iyang online business, nihukom siya nga magbukas og gamay nga tindahan niadtong 2014. Nag-abang siya og P15,000 matag buwan sa iyahang pwesto diha sa Banilad nga iyang ginganlan og April Bakeshop. Apan pito lamang ka bulan kini nga nilungtad.

 “Wala siya ni-click kay wala siyay parkingan, dili makahunong ang kostumer,”rason niya, kinsa nidugang nga ang laing hinungdan mao nga kuwang ang iyang puhunan ug wala usay klarong nagdumala sa maong negosyo.

Busa, nibalik siya pagpanawat og orders online ug nag-bake pag-usab sa iyang balay. Hangtod may nakaila siya nga usa ka langyaw nga nahimo niyang business partner.

Ang ilang kasabutan mao nga bayran siya sa langyaw og P1M alang sa tanan niyang mga recipe ug gamit sa baking, ingon man aron ang iyang costumer adto na sa bag-ong tindahan niini mupalit.  Apan sa usa ka milyon gisaad nakadawat lang siya og P750,000.00. Ang tunga sa milyon gipundo niya sa ilahang negosyo ug ang sobra  iyahang gitipigan.

Nibarog ang ilahang tindahan niadtong  tuig 2015 diha sa Mabolo. Sa sinugdanan, maayo ang relasyon nila sa iyahang business partners, apan kalit lang kining nausab dihang nagdumili na kini paghatag sa kuwang nga bayad.

 “Di na mi magkasinabot, dili naman ko happy.So I decided nga mobalik na lang ko sa balay,” nagkanayon siya.

Giisip kadto ni April nga dakong pagkalukapa sa iyahang negosyo  sanglit tanan niyang recipe ug mga kostumer nawala naman niya. Naglisod na siya sa pagbayad sa matrikula sa iyahang mga anak nga nagtungha puros sa pribadong tunghaan.

Nibalik na sab siya sa uno, pinaagi sa pagnegosyo didto lamang sa iyang balay. Nikusog kini pagbalik, apan sa nilabay nga tuig, gisungog na sab siya sa kahigayonan. Gitakbuyan siya og cancer sa nostrils gumikan sa grabe niya nga allergy sa harina. Mipailawom siya og radiation ug laser procedure alang sa niburot niya nga liog.

Naputos sila sa utang atol sa iyahang pagkasakit. Ug gikan sa 200 kilos nga timbang, nihugo siya ngadto na sa 110 kilos gumikan sa iyang balatian.  Apan bisan og wala pa hingpit nga naayo, nibalik og dawat og orders si April aron makabayad sa tuition sa iyang mga anak.

Pilay dagan sa panahon, nakabarog pag-usab si April.  “Tungod sa cake, nakapalit ko’g sakyanan ug nakapaeskwela ko sa akong mga anak.Graduating na akong eldest karon,”padayag niya ngadto sa Banat News Tingusbawan.

Alang kang April ang pagbulig sa Kahitas-an ang labing dakong rason sa iyang natagamtam karon.

“Kung way order, way kwarta. Pero kung mangayo ko’s Ginoo kay ihatag man,” nagkanayon siya.

Alang kang April, kon lami gyud ang imong timpla, pangitaon gyud kini sa customer.  “Tinud-anay ug sakto sa rikados ug dili baratohon,” pasigarbo pa niya. “Kung lamian ang imong customer kay manabi gyud na sa ilahang friends.”

Busa tambag niya sa buot magnegosyo mao nga magkugi gyud ug magmatinud-anon aron molampos.

“Pursigido ka. Kaduha ko nalamba pero nibarog ra gihapon ko. Dili mawad-an og paglaom. Pag-ampo sa Ginoo ug ayaw pangilad sa kostumer.”