Anak sa suspek sa road rage hapit patya

CEBU, Philippines — Nasuta sa kapolisan nga buot unta mopatay sa iyang 19-anyos nga anak nga babaye niadtong Hunyo 11, 2017 kadtong suspek sa road rage sa Pope John Paul II Avenue, Dakbayan sa Sugbo niadtong Martes.

Kini dihang gisubay sa Investigation, Detection and Management Bureau ang background ni Edward Erasmo, taga Tayud, Lungsod sa Liloan.

Matud pa nga wala na mapasakai og kasong attempted homicide si Erasmo sa iyang anak niadtong higayuna.

Sigun pa sa hepe sa IDMB, Superintendent Ryan Devaras, nga magbalhin-balhin og abangan nga balay ang suspek ug giingong di pa gyud mobayad.

Gani kadtong sakyanan nga gigamit atol sa nahitabong road rage inabangan sab niya ug matud pa wala sab kini nabayri.

Wala pa mapasakai og kasong physical injury ang suspek gumikan kay wala pa makaluwat og affidavit ang mga saksi sa maong insidente.

Padayon pa gihapon ang hot pursuit operation batok ni Erasmo.

Gipasanginlan si Erasmo nga mao ang lalaki sa video nga nag-viral sa internet diin makita nga nanghasi ngadto sa usa ka taxi driver nga si Christopher Labor.

Nasayran nga nag-trending sa social networking site nga Facebook ang panghitabo human usa ka Cai Cabanalan ang ni-post sa video sa panghitabo.

Makita nga alas 3:55 sa hapon niadtong Martes nikanaug ang usa ka lalaki gikan sa usa ka Toyota Innova ug gipatiran ang side window sa taxi dayon hapak niini og bato hinungdan nga nabuak ang bildo.

Nihagit pa si Erasmo nga pusilon si Labor.

Dugang ni Devaras nga dako ang matabang sa maong video sa kasong ipasaka batok kang Erasmo. -/GMR (BANAT NEWS)