Phase 1 sa underpass ipadayon human sa Kalag-kalag

CEBU, Philippines — Tugutan sa Cebu City Transportation Office (CCTO) ang WT Construction Inc., ang kontraktor sa P638 milyones nga underpass project sa Natalio Bacalso Avenue ug F. Llamas Street, nga makapadayon sa Phase 1 human sa Kalag-kalag.

Nagkanayon ang pangulo sa CCTO nga si Francisco Ouano nga sakto lang nga magsugod sa boring ug piling works sa project site sa south bound lane sa N. Bacalso Avenue atubangan sa usa ka fastfood chain human sa Kalag-kalag.

Kini aron minus ang mga sakyanan nga moagi sa maong dapit ug dili makamugna og kahuot sa dagan sa trapiko.

Sa dili pa makasugod ang kontraktor sa phase 1, gusto sab niini nga mapahibawo ang publiko aron masayud sa mga posibleng kausaban sa rota.

“Maybe after Kalag-kalag na lang para dili kaayo dagsa ang mga tawo, para naa say time ang DPWH-7 to inform the public kay dili man ta ka deretso og sira sa area,” sigun ni Ouano.

Gani si Ouano niingon nga dihang gibisita niya ang lugar niadtong Miyerkules sa niaging semana nagpadayon ang pagtrabaho sa phase 2 sa proyekto sa atubangan sa usa ka shopping center.

Kahinumduman nga dunay kausaban sa construction plan aron masugdan ang underpass project sa N. Bacalso Avenue ug F. Llamas Street human sa phase 1 adunay nakita nga linya sa Metropolitan Cebu Water District nga maapektuhan ug kinahanglan atimanon.

Nangayo og pagsabot ingon man pasensya si Ouano sa publiko nunot na sa nasinating traffic congestion sa lugar.

Samtang si DPWH Project Engineer Roy Dela Cruz niingon nga uyon ra siya sa tinguha ni Ouano.

Apan ang orihinal nga plano sa DPWH nga makasugod sila sa Oktubre 28.

Nitataw kini nga sa dili pa magsugod ang kontraktor sa phase 1 dunay himoong information dissemination mahitungod niini. -/GMR (BANAT NEWS)