Seguridad sa cathedral gipahugtan

CEBU, Philippines — Gipahugtan ang seguridad alang sa ika-limang adlaw sa haya ni Archbishop Ermeritus Ricardo Cardinal Vidal sa Cebu Metropolitan Cathedral gumikan sa walay hunong nga pagdagsa sa mga tawo nga gusto makakita kaniya sa kataposan nga higayon sa dili pa kini ilubong sa adlaw’ng Huwebes. Matud pa ni Fr. Joseph Larida sa safety and security committee nga pinili lang mga sakyanan nga makaagi ug makasud sa compound sa cathedral tungod sa kadaghan sa mga tawo.   Gipakatap usab ang mga sakop sa Parish Security Group diha sa sulod. Samtang si Police Inspector Jerry Bawiga ang security supervisor sa Police Station 3 miingon nga mas midaghan ang mga tawo kagahapon kay adlaw man nga Domingo hinungdan nga gidoble usab nila ang mga polis.

Samtang usa sa mga sakop sa Knights of  Columbus miingon nga adunay mga gidili sa mga motan-aw sa cardinal, kini mao ang pagkuha og buwak, ang paghikap sa painting kilid sa lungon ug pagkuha og litrato duol sa lungon. Gipahimangnoan usab ni Larida ang mga katawhan ilabi na ang gikan sa nagkalain-laing parokya  sa paggamit og mga bus aron mausa lang sila  ug mamenusan ang mga sakyanan nga mag-parking duol sa cathedral. -/IBM (BANAT NEWS)