Kilos Sambayanan gilusad sa DA
CEBU, Philippines — Kapin sa 200 ka mga tawo gikan sa mga nagkalain-laing sektor sa dakbayan sa Sugbo ang nagtapok alang sa “Kilos Sambayanan”, mga pagtuki sa nagkalain-laing proyekto sa gobiyerno kabahin sa yuta, pagkaon ug puy-anan nga gihimo diha sa Cebu Normal University.
Nagpadala og mga representante ang sector sa panguma, pangisda, mga kooperatiba ug uban pa aron sa pagpaminaw kun unsa ang ilang mga benepisyo nga nadawat ug madawat pa sa nagkalain- laing ahensya aron molambo ang ilang mga panginabuhian.
Mipadangat sila sa ilang mga katuyuan sama sa tukmang pag-implementar sa Organic Farming Law, pagpamuhi og hayop, ug subsidiya sa abuno, proteksyon sa mga fish sanctuaries ug fish seasonal bans diha sa Department of Agriculture.
Si Marina Hermoso, hepe sa Department of Agriculture 7 nagkanayon nga ubay-ubay na ang mga programa sa kapin napulo ka mga ahensya aron masulbad ang mga suliran sa pagkaon, puy-anan ug yuta. Matud ni Matea Traya, sa Langtad Agrarian Reform Beneficiaries Multipurpose Cooperative (LARB-MPC) sa dakbayan sa Naga nga nasayran na nila karon kun unsa pang mga benepisyo nga angayan makuha sa ilang kapunungan gikan sa gobiyerno. Gawas sa DA, ang ubang mga ahensya mao ang Department of Agrarian Reform (DEAR), Department of Environment and Natural Resources (DENR), National Irrigation Administration (NIA), Department of Interior and Local Government (DILG), Bureau of Fisheries and Aquatic Resources (BFAR), Housing and Urban Development Coordinating Council (HUDCC) National Food Authority (NFA), Philippine Information Agency (PIA), PAGIBIG Fund. (IBM) (BANAT NEWS)
- Latest