Banat ( Leaderboard Top ), pagematch: 1, sectionmatch: 1

Pahimangno batok krimen

CEBU, Philippines — Gipangapod-apod sa kapolisan sa Siyudad sa Talisay ang mga flyers nga pahimangno aron malikay sa krimen ang katawhan.

Si Supt. Jason Villamater, hepe sa kapolisan sa siyudad, maoy nangulo sa paglibot sa mga lugar nga tapukanan sa katawhan sama sa mga tunghaan ug mga malls.

Matud ni Villamater nga kasagaran sa mga mabiktima mao gyud ang mga tinun-an maong ilang gituyo nga adto sila sa tunghaan. Lakip sa gipahinumduman ang kabatan-onan nga molikay sa pag-apil sa grupo nga pulos gara-gara ang gipangbuhat.

Kusog sa siyudad ang gang war diin daghan na nga panghitabo ang natala sa kapolisan tungod sa panagbangi sa mga grupo sa mga batan-on.

Pipila sa mga pahimangno naglatid nga likayan ang pag-post sa social media sa residensya, mahalon nga butang, likay sa ngitngit nga lugar, likay sa paggamit og ATM machine sa kagabhion ug uban pa.

Iya sab giawhag ang tanan nga kung aduna’y mga panginahanglan sa presensya sa kapolisan tawagan lang ang ilang telepono o hotline.

Si Gesin Novarion, security manager sa Gaisano Fiesta Mall sa Tabunok, nagkanayon dakong tabang ang gihimo sa mga polis aron magmatngon ang publiko sa mga dautang elemento.

Asoy pa niya nga ang pagpangawat o tulis maoy komon nga krimen nga mahitabo niining buwana nga nagsingabot ang Pasko. (BANAT NEWS)

 

  • Follow Us: