P42B budget giduso ni Luigi

CEBU, Philippines — Gipasabot ni Mandaue City Mayor Gabriel Luis “Luigi” Quisumbing ang pagdoble sa kantidad sa giduso niyang budget alang sa sunod tuig diin nalakip ang pagatukuron nga government center.

Si Quisumbing nipasabot nga sa mokabat P4.2 bilyones nga budget nalakip niini ang mga proyekto nga gitumong alang sa pagsulbad sa suliran sa pagbaha ug ang suliran sa trapiko.

Gitataw niya nga naglakip sa maong gahin ang problema sa basura nga gigahinan og P105.64 milyones isip kabahin sa flood control projects sa dakbayan.

Matud niya nga ang problema sa dakbayan dili lang masulbad sa inprastraktura nga mga proyekto tungod kay nagkinahanglan man usab kini og pagtabang sa katawhan pinaagi sa paglikay nga magpataka og labay sa ilang mga basura.

Dugang pa niya nga gawas sa flood control project ubos sa maong gahin nalakip usab ang P170 milyones nga tukuron nga Material Recovery Facility (MRF) sa kanhi Umapad Dumpsite.

Sulod sa maong MRF anaa ang tulo ka dagkong conveyor nga moproseso unya sa basura.

Gitataw ni Quisumbing nga kapin usab sa P600 milyones ang magasto sa kagamhanan sa dakbayan alang sa pagtubag sa problema sa trapiko ug baha nga kinahanglan nga masulbad pinaagi sa paghimo og dugang infrastructure projects ug pag-abli og bag-ong mga dalan.

“We’re improving and opening some of the roads but really, part sa problema nato is volume sa vehicles,” matud sa mayor.

Sumala pa sa mayor nga ang 35 kilometros nga dalan sa dakbayan dali gyud kaayo maghuot ang mga sakyanan.

Nunot niini duha usab ka bag-ong mga dalan ang ablihan sa dakbayan sunod tuig gawas sa laing pito ka kasamtangang dalan nga giplano karon nga palambuon. (BANAT NEWS)