2018 budget sa Talisay tukion na
CEBU, Philippines — Gipahibawo ni Bise Mayor Alan Bucao sa Siyudad sa Talisay nga posible nga ilang maaprubahan ang gipangayo’ng budget ni Mayor Eduardo Gullas karong Disyembre.
Kini human ila pa tagsa-tagsaon sa pagbasa ang matag pahina sa gihatag nga 2018 proposed budget ni Gullas nga mokapin sa usa ka bilyon ka pesos.
Matud ni Bucao nga karong semanaha ang ilang panahon sa iyang mga kauban sa konseho sa pagsusi sa proposed budget sa mayor human sa kapistahan ni Sta. Teresa de Avila.
Sa unang semana sa Nobiyembre na ang ilang budget hearing dayon sa ikaduhang semana sa Disyembre mao ang pag-aprubar nila sa gipangayo nga budget ni Gullas.
Dili pa sab makasulti si Bucao kun aduna ba sila’y ilaslas sa gipangayo nga budget sa mayor tungod kay hasta siya mobasa pa man niini.
Siya nipasabot nga kun aduna sila’y makita nga mas kinahanglan gyud sa usa ka departamento, hayan walay laslas ang budget.
Si Gullas niduso na sa iyang proposed budget sunod tuig diin gilakip niini ang iyang mga proyekto nga gustong ipatuman sama sa paghimo sa giabandonar nga Lagtang Market isip Technical Vocational Center, pag-ayo sa mga karsada, pagbutang og mga suga sa kadalanan ug paghimo og mga kanal aron masulbad ang pagbaha matag bunok sa uwan. (BANAT NEWS)
- Latest
