Mga kabataan niyukbo kang Vidal

MANILA, Philippines — Gikan sa pag-abot sa lawas ni Archbishop Emeritus Ricardo Cardinal Vidal sa Archdiocesan Shrine of San Pedro Calungsod sa Archbishop Palace dalan Jakosalem ning Dakbayan sa Sugbo hangtod sa iyang pagbiya walay puas ang pag-abot sa tawo diin kadaghanan mga batan-on.

Matud pa ni Police Officer 2 Alfredo Pandaan, Team leader sa kapulisan gikan alas siete sa buntag hangtod alas singko sa hapon mokabat singko mil ka mga batan-on ang niabot sa shrine ni Calungsod aron pagyukbo sa cardinal.

Upat ka mga misa ang gihimo sa shrine, diin usa niini gihimo ang tribute sa mga batan-on ngadto kang Vidal.

Si Vidal maoy nitatak sa kasingkasing ug hunahuna sa mga millenials ug sa ilang mga ginikanan tungod kay mao na kini ang arsobispo sa Sugbo sugod pa tungatunga sa dekada 80.

Siya usab mao ang ni-organisar sa gitawag karon nga tinuig nga Local World Youth Day diin daghang mga kabataan gikan sa nagkadaiyang parokya sa artsidiyosisis ang magtapok kauban si Vidal alang sa nagkadaiyang mga espirituhanong kalihokan.

Pipila ka mga piniling kabatan-onan sa Archdiocese of Cebu ang nipaambit sa ilang mga kasinatian sa buhi pa si Vidal ug mipamatuod sa kaayo ug dakong gugma niini sa mga kabatan-onan.

Kadaghanan usab sa mga batan-on ang nipapilit sa ilang mga mensahe sa board para kang Vidal, diin ang uban adunay hulagway sa ilang panagkuyog sa Cardinal.

Miabot og 65 ka nagkalain-laing youth organizations gikan sa  mga parokya ang niyukbo , ang uban gikan pa sa Daanbantayan, San Remegio ug Malabuyoc.

Ang maong tribute gitapos sa usa ka awit nga nagulohan og Harana ug gisunod gilayon ang Santos nga Misa nga gidumala ni Archbishop Jose Palma.

Ang pagdala sa lawas ni Vidal sa shrine natumong usab sa ikalimang kasumaran sa pagkahimong santos sa batan-ong Bisaya nga si San Pedro Calungsod. Si Vidal maoy nilihok sa mga proseso alang sa pagka beato niini hangtud ngadto sa pagka santos.

Atol sa homiliya ni Palma, gipasalamatan niini si Vidal sa pag-ingon: " RCC thank you for being Gods value to us. Life is a gift, gratitude, a way of reaching out, a way of being a legacy to others, as we journey with the young people."

Human sa misa nagpadayon ang pagyukbo sa mga batan-on ug mga alas siete ang takna sa kagabhion gibalik kini sa cathedral.  Si Frankle Margalle, youth coordinator sa Commission on Youth miingon nga tungod kang Vidal nakita sa katilingban nga may paglaom pa gyud sa mga kabataan sa panahon karon.

Sumala pa niya, dili gyud nila makalimtan ang mensahe sa cardinal ngadto sa mga kabataan matag adunay mga kalihokan ang kabataan nga pagpabilin nga maluloy-on ug pagpasaylo sa mga tawo nga nakasala kanila. (BANAT NEWS)