2 missing gidagsa sa Leyte
CEBU, Philippines — Duha ka babaye nga kalit lang nawagtang samtang nanginhas sa hunasan sa Sitio Saac, Barangay Buaya, Dakbayan sa Lapu-Lapu sa Domingo sa hapon sa Oktubre 15 ang napalgan kagahapon sa buntag nga gidagsa didto sa baybayon sa Sitio Canbatuan, Barangay Tinag-an, Lungsod sa Albuera, Lalawigan sa Leyte.
Ang maong gilay-on kon tabukon agi sa dagat may gilay-ong 297.97 milya o 399.06 kilometros gikan sa Lapu-Lapu City ug gidudahan nga nadala sila sa sulog sa dagat padung sa maong lugar.
Si Police Officer 2 Gino Guiaman sa Presinto 5 sa Lapu-Lapu City Police Office (LLCPO) miingon nga ang maong patay’ng lawas nga napalgan ang gikompirmar sa mga kabanay ug mga kauban sa trabaho sa duha.
Giila ang duha ka mga patay’ng nga mao sila si Helen Gingco, 25, ug Jennie Rose Tormon, 27, nga nawagtang dihang kalit lang mikusokuso ang kusog nga unos atol sa ilang pagpanginhas sa hunasan sa Barangay Buaya sa Lapu-Lapu City, Cebu.
Matud pa ni PO2 Guiaman nga ang mga lumolupyo sa nahisgotang lugar maoy nakakaplag sa duha nga gidagsa na sa baybayon ug daling mitawag sa kapolisan sa Albuera.
Giingong daan nang naabisohan ang kapolisan sa Leyte ug mga kanait nga dapit sa Sugbo bahin sa duha ka babayeng na-missing gikan sa kadagatan sa Lapu-Lapu City. Dugang pa niya nga giplano na sa pamilya ang pagdala sa duha ka patay’ng lawas kasamtangan karon anaa gipahiluna sa usa ka punerarya alang sa pagbalik sa ilang dapit sa Dakbayan sa Lapu-Lapu.
Si PO2 Guiaman miingon nga naglakip sa miila sa patay’ng lawas mao ang mga kauban nilang nga mga kawani sa gitrabahoan nilang kompanya diha sa Mactan Export Processing Zone sa Barangay Pusok sa Dakbayan sa Lapu-Lapu.
Ang una nilang giila ang gisul-ob nga senina ug short pants dihang nahitabo ang ilang pagkawagtang atol sa ilang pagpanginhas.
Ang duha ka kauban nila sa trabahao nga nanginhas adtong tungora mao sila si Jessica Salisi ug Glenda Docdoc nga daling nakapadaplin human nila nabantayan nga misaka ang tubig diha sa hunasan ug kusog kaayo ang unos, apan ang duha wala na makaabot sa baybayon. (BANAT NEWS)
- Latest