Illegal recruitment giyerahon sab

CEBU, Philippines — Hugtan sa mga awtoridad sa Sugbo ang pag-monitor sa ilegal nga pagpang-recruit nunot sa mando ni Presidente Rodrigo Duterte ngadto sa National Bureau of Investigation ug Criminal Investigation and Detection Group.

Matud ni Senior Inspector Edwin Lacostanes sa CIDG-7 nga mas pahugtan pa nila karon ang ilang pag-monitor sa illegal recruitment.

Ang direktiba ni Duterte giluwatan atol sa ikapitong anibersaryo sa usa ka programa sa telebisyon alang sa mga Overseas Filipino Workers sa Pasay City.

Dugang ni Duterte nga sama sa drugas, modeklarar sab siya og “war against illegal recruitment” diin usa kini sa mga rason kung nganong daghang Pilipino ang naglisud og trabaho sa gawas sa nasud. Giangkon ni Lacostanes nga bisan wala pa sila kadawat sa opisyal nga direktiba, aduna na silay gihimong koordinasyon sa Philippine Overseas Employment Administration (POEA) ug uban pang ahensya sa gobiyerno nga nag-monitor sa illegal recruitment sa Dakbayan sa Sugbo.

Ang hepe sa Investigation and Detection Management Bureau nga si Police Superintendent Ryan Devaras niawhag sab sa katawhan nga moduol una sa POEA ug uban pang labor agency aron dili mabiktima sa illegal recruiter. (BANAT NEWS)