Gamit pamanday ipabilin sa Terminal

CEBU, Philippines — Gipahimangnoan sa tagdumala sa Cebu South Bus Terminal sa mga gidili nga dad-on atol sa sakay sa Kalag-kalag.

Si Joey Herrera, pangulo sa CSBT, nipahimangno nga dili mahimong magdala og mga hait nga hinagiban tungod kay kuhaon gyud kini sa mga tigbantay.

Kini naglakip sa gabas, martilyo ug tigib nga sagad dad-on sa mga panday apan ipakuha og balik human sa okasyon.

Gawas sa pagdala og mga hinagiban, si Herrera niawhag sab sa mga pasahero nga dili dayon silyuhan pag-ayo ang mga butang o karton nga dala tungod kay ipatuman gihapon sa terminal ang “open bag policy” ug unya na isirado og maayo human sa inspeksiyon.

Sama sa naandan nga tingsakay, adunay lugar alang sa mga priority passengers sama sa tiguwang, mabdos, adunay dala nga masuso ug persons with disabilities apan nipasabot si Herrera nga matag priority passenger, usa ra ka regular passenger ang madala aron mahatagan og lugar ang ubang pasahero sa bus.

Wala sab magpasabot nga tanang priority passengers ang makasakay dayon sa usa ka bus ug kinahanglan hatagan og pwesto ang mga regular nga pasahero. Gidili usab ang pagpareserba sa mga grupo nga pasahero ug kinahanglang mosunod gyud sa linya depende kung kinsa ang una niabot.

Si Herrera nagkanayon nga nanghuwam na sila og portalets gikan sa lokal nga kagamhanan sa Dakbayan sa Sugbo nga ibutang sa mga holding area sa atubangan ug luyo nga bahin sa terminal alang sa pasahero.

Inig abot sa panahon nga adunay mga pasahero nga maghulat na sa ilang bus og usa hangtud duha ka oras, si Herrera nagkanayon nga adunay duha ka Kaoshiung Bus nga gipahuwan ang Dakbayan sa Sugbo ug usa gikan sa Kapitolyo aron maoy mohakot sa mga pasahero.

(BANAT NEWS)