Pagkiha kang Osmeña, mga konsehal may bulok politika?

CEBU, Philippines — Nagtuo si Cebu City Mayor Tomas Osmeña nga politika ang motibo sa administrative case nga giatubang niya ug mga kaubanang Konsehal sa Bando Osmeña Pundok Kauswagan (BOPK) sa Office of the Ombudsman Central Office.

Ang maong reklamo may kalabotan sa pasangil nga iregularidad sa pagtudlo ni Osmeña og mga Deputy Mayors.

Si kanhi National Bureau of Investigation (NBI)-7 director Atty. Florencio Villarin mao ang misang-at og kaso batok kang Osmeña tungod matud pa nakahimo ang mayor og dishonesty, grave misconduct prejudicial to the best interest of the service, ug culpable violation sa constitution ubos sa Section  60 sa Republic Act 7160 tungod sa maong appointments. Sa reklamo niini nga dunay petsa nga Septiyembre 27, gipasanginlan ni Villarin ang mga respondents nga nakalapas sa Code of Conduct and Ethical Standards for Public Officials and Employees ug sa 1987 Constitution.

Nagkanayon ang mayor nga sa mga miaging katuigan dihang si Villarin pa ang director sa NBI-7 giingong mihangyo kini kaniya nga i-endorsar aron matudlo nga NBI-National Director apan wala niya kini buhata.

“I did not refuse. I just did not do it because I don’t think he’s good enough for national. He runs for Congress three times, maybe he is kulang sa pansin,” sigon ni Osmeña.

Subling gihimug-atan sa mayor ang designation sa mga konsehal isip Deputy Mayors usa lang ka ngalan sanglit ang mga gitudlong opisyal  wa may gipirmahang mga tseke ug dili usab mo-disburse og pundo.

Sigon ni Osmeña gigamit lang niini ang talento sa mga konsehal pinaagi sa pag-assign kanila sa mga gimbuhatan nga kaya nilang buhaton.

Si Villarin mihimakak sa pamahayag ni Osmeña nga nangayo kini og endorsement sa mayor.

“That’s not true, kanang iyaha exaggeration lang na. Honestly, I did not asked him to endorse me, ang nag-endorse nako kay silang Department of Justice Secretary Teofisto Guigona, former senator Rene Cayetano. I did not need him at that time, who is he by the way?” sigon ni Villarin.

Matud niya mipasaka siya og kaso kay ang maong mga opisyales nakalapas sa balaod. Ug kini makatabang kang Presidente Rodrigo Duterte pagwagtang sa mga kurakot sa gobiyerno. (BANAT NEWS)