Road rage suspect may patong sa ulo

CEBU, Philippines — Suspek sa nahitabong road rage diha sa Pope John Paul II Avenue, Barangay Kasambagan, dakbayan sa Sugbo niadtong Martes gipangita sa kapolisan samtang si Cebu City Mayor Tomas Osmeña mitanyag og P10 mil nga reward sa makahatag og impormasyon aron kini madakpan.

Ang mga operatiba sa Investigation, Detection and Management Branch (IDMB) ug Mabolo Police Station nangita na ni Edward Erasmo kinsa mao ang tawong nakuhaan og video nga nag-viral sa social media.

Si Erasmo nakita sa video nga mihasi ngadto sa taxi drayber nga si Christopher Labor pinaagi sa pagpatidpatid niini ug gipusdakan pa gyud og tipak nga semento hinungdan sa pagkasamad niini.

Ang hepe sa IDMB nga si Superintendent Ryan Devaras miingon nga desidido si Labor nga mopasaka og kasong physical injury ug grave threats batok kang Erasmo.

Dugang ni Devaras nga mopasaka sab og kasong estafa ang tag-iya sa sakyanan nga gigamit ni Erasmo dihang nahitabo ang maong kagubot human duha ka semana kining wala na mi-contact ug wa mobayad og abang.

"Kung pormal na nga mapasaka ang kaso, di na mi mag-hot pursuit operation. Warrant na," sigun pa ni Devaras.

Ni-trending sa social networking site nga Facebook ang panghitabo human usa ka Cai Cabanalan, ang ni-post sa video sa panghitabo diin makita nga alas 3:55 sa hapon niadtong Martes, nikanaog ang usa ka lalake sakay sa usa ka Toyota Innova ug gipatiran ang side window sa taxi dayon og hapak niini og bato hinungdan nga nabuak kini ug gibaharan niini si Labor nga iyang pusilon.

Si Devaras mibutyag nga giuli sa asawa ni Erasmo ang sakyanan niadtong Huwebes human kini nakigkita sa tag-iya. Matud pa nga wala masayri sa asawa ang lokasyon sa iyang bana.

"Stay calm lang kung naa ta sa dalan. Kung naay gustong mosingit aw pasingita na lang aron way gubot. Patience lang ta," tambag pa ni Devaras sa mga motorista.

Si Osmeña mibutyag nga aduna siyay mga impormanteng nitug-an nga nilarga og kaulohan si Erasmo.

"I don't like to see people like this, they are not welcome here in our city" sigon ni Osmeña.

Matud sa mayor di siya motugot nga adunay maghawod-hawod dinhi sa siyudad.

"It is a warning to everybody, you cannot do that here in our city" dugang pa ni Osmeña. (BANAT NEWS)