Wa palargaha

CEBU, Philippines — Mga gagmay nga barko nga moubos og 250 gross tons wala tugoti sa Philippine Coast Guard nga makalawig tungod sa kadagko sa balod nga nasinati dala niining bagyong Paolo nga atoa karon sa sidlakang -amihanang bahin sa Luzon.

Matud pa nga 68 ka mga biyahe ang gikanselar tungod sa giisyu nga gale warning sa Pagasa sa tibuok Visayas kagahapon.

Kini miresulta sa pagka-stranded sa 127 ka pasahero nga mosakay unta sa MV Fastcraft Aznar 3 gikan sa Toledo port sa Toledo City padung sa San Carlos City sa Negros Occidental.

Ang pagkanselar sa biyahe nagsugod alas 12 sa udto hangtud sa alas 6 sa gabii sa nagkadaiyang pantalan sa Cebu padung sa Bohol (Getafe, Tubigon, Tagbilaran, Leyte (Ormoc, Hilongos, Isabel and Naval) ug ubang bahin sa Cebu (Camotes ug Danao City).

Sa  Gale Warning # 9 nga gipagawas kagahapon sa alas 5:00 sa hapon apektado sa kusog nga hangin dala sa bagyong Paolo  ang eastern seaboards sa Visayas (Samar, Leyte Provinces, Biliran, Bohol, Cebu, Negros Provinces, Siquijor, Guimaras, Panay Island ug Boracay Island) ug moabot 3.4 metros hangtud 4.5 metros ang gitas-on sa bawod.

Si Jomar Eclarino, ang Weather Specialist sa PAGASA Mactan nga nahinabi sa Banat News miingon nga masinati gihapon karong adlawa ang kasarangan ngadto sa makusog nga paghuros sa hangin sa habagatan nga kasadpan.

Samtang si Cebu Coast Guard Commander Jerome Cayabyab miingon nga naaberya ang LCT Light Ferry 26 nga iya sa Lite Shipping Lines human natangtangan og pin ang rampa nga agianan sa mga kargamento hinungdan nga niyunyon kini sa tubig  samtang naglawig diha taliwala sa may Talisay ug Cordova.  Matud pa nga padulong kini sa Bohol.

Sumala pa ni Cayabyab, luwas hinoon ang 14 ka mga pasahero ug 23 ka crew, diin adunay duha ka tugboat nga gipadala ang shipping lines aron moabag.

Sa laing bahin,  ang pangulo sa Provincial Disaster Risk Reduction and Management Office (PDRRMO) nga si Baltazar Tribunal Jr. miawhag sa mga mananagat nga dili morisgo og panagat ug iyang gihangyo ang mga namuyo sa mga landslide prone areas, duol sa kasapaan  nga mohiklin lang una sa mas luwas nga lugar. (BANAT NEWS)