Dako nga budget sa basura gikwestiyon

CEBU, Philippines — Gikwestiyon sa mga konsehal sa Barug Team Rama ang gidusong budget alang sa basura kay matud pa dako ra ang maong kantidad.

Moabot sa kapin P400 milyones ang giduso nga budget alang  sa sunod tuig diin P65 milyones niini gitagana sa abang sa mga heavy equipment nga gamiton pagkolekta sa basura.

Si Konsehal Raymond Garcia niingon nga nahibulong sila sa Barug Team Rama kun nganong niabot og P400 milyones budget sa basura nga dako ra itandi sa nilabay nga administrasyon nga naa lang sa P120 milyones.

Gihulagway sa konsehal nga kaupat gipilo ang kantidad ug tungod kay dako man ang kantidad angayan nga ingon usab ang resulta sa pagkolekta sa basura. Gihulagway niini nga dili epektibo ang pagkolekta sa basura hinungdan nga ang maong giduso nga budget ilang hashasan ug kun dunay makita nga overpriced o kaha anomaloso ila kining supakon ug gipasalig niini nga kadtong mga makatabang gyud sa siyudad ilang aprubahan.

Sa iyang bahin, si Konsehal Jose Daluz III niingon nga angayan nga gastuhan gyud sa siyudad ang mahitungod sa basura.

Si Konsehal Joel Garganera niingon nga ang hinungdan matud pa nganong dako na og gasto ang siyudad sa basura kini tungod sa garbo ni Mayor Tomas Osmeña. Ang gipasabot sa konsehal mao ang hugot nga baruganan sa mayor nga dili molabay sa private landfill sa Lungsod sa Consolacion kay giingong anomaloso ang transaksiyon panahon sa administrasyon ni kanhi mayor Michael Rama.

Si Garganera niingon nga kun ang mga barangay sa north district tugutan lang nga direktang molabay mas makaminus ang siyudad.

Giangkon ni Osmeña nga dako gyud ang maong kantidad apan kini nitataw nga ang tumong sa kagamhanan nga makolekta gyud ang basura ug kun makab-ot na kini diha na mahitabo ang adjustments.

Giklaro sab sa mayor nga bukas siya sa tinguha ni Garganera apan walay niduol kaniya nga barangay.

Gihimug-atan sab niini nga kun mogamit sa landfill sa Consolacion kinahanglan kini moagi og bidding ug gani niingon si Osmeña nga andam siya motabang sa bidding. (BANAT NEWS)