Wanted nitahan sa bise mayor
CEBU, Philippines — Nitahan ngadto kang Bise Mayor Jonnah John Ungab kagahapon ang giilang hitman ug most wanted sa Lungsod sa Ronda ug gitumbok nga person of interest sa pipila ka kasong murder sa maong lugar.
Ang suspek mao si Jeric Torres alyas A-ay, 35, taga Campo, Barangay Ilaya, Ronda samtang ang ig-agaw niini nga si Jake Omboy alyas Jik-jik kinsa top 6 nga most wanted person sa tibuok Central Visayas sa kasong pagpatay ang padayon pa nga gipangita.
Si Torres nga una na nga niangkon sa media nga daghan na ang iyang napatay ang nalutsan og warrant of arrest niadtong Oktubre 1, 2017.
Ang hepe sa kapolisan sa Ronda ug hepe sab sa Provincial Intelligence Branch nga si Superintendent Joie Pacito Yape niingon nga niadtong Lunes giadto nila ang panimalay ni Torres apan wala siya.
Dihang nasayran ni Torres nga dakponon siya hinungdan nga nitahan na lang sa bise mayor.
Matud ni Yape nga niadtong Septiyembre 14 nagpahigayon og Oplan Katok diin usa si Torres sa mga nitahan sa iyang mga armas nga kalibre .30 grand rifle ug usa ka kalibre .45.
Dugang ni Yape nga nalambigit sab sa ilegal nga pagpamaligya og drugas si Torres.
Giingong 15 ka tuig na nga nagkabangi ang pamilya nilang Omboy ug Torres.
Gani, matud pa magpinatyanay ang duha ka pamilya apan wala pay nangiha sa duha ka habig hinungdan nga daghan ang kasong murder nga wala pa nasulbad hangtud karon.
Giingong gigamit sab sila nga mga hitman matag eleksyon. (BANAT NEWS)
- Latest
