Politika gipadaplin una Decemay
CEBU, Philippines — Gipadaplin una sa mga opisyales sa siyudad sa Sugbo ang politika alang kang Cebu Archbishop Emeritus Ricardo Cardinal Vidal nga mipanaw na niadtong adlaw’ng Miyerkules. Nipahinungod og misa ang kagamhanan sa siyudad diha sa Cebu Metropolitan Cathedral.
Pipila sa mga mitambong mao sila si Mayor Tomas Osmeña , Vice Mayor Edgardo Labella, North District Representative Raul del Mar, silang Konsehal Raymond Garcia, Joel Garganera, Jose Daluz III, Pastor Alcover Jr., Eugenio Gabuya Jr., Dave Tumulak, Margarita Osmeña.
Ang magtiayong Osmeña miingon nga dako og natampo sa kinabuhi sa mga Sugbuanon si Vidal ug tungod sa kamaayo niining tawo pinangga kini sa tanan. Sila si Garcia, Garganera miingon nga mingawon sila ni Vidal ug sa mga natampo niining kaayohan dili lang sa Sugbo apan sa tibuok nasud magpabilin ug dili makalimtan.
Samtang si kanhi mayor Michael Rama nga miduaw sa haya sa cardinal kagahapon sa buntag miingon nga daghan siya og dili malimtan nga kasinatian kang Vidal.
Mitataw kini nga mitaliwan man sa laing kalibutan si Vidal apan magpabilin gyud ang iyang presensiya ug ang mga pagtulun-an. “Kawad-on sa Simbahang Katoliko ug kawad-on sa Sugbo,” kini maoy paghulagway ni Talisay City Mayor Eduardo Gullas sa kamatayon ni Vidal.
Matud pa ni Gullas nga susama ra nga namatyan siya og membro sa iyang pamilya tungod kay si Vidal suod man sa ilang pamilya kay giisip man kini sa ilang inahan nga si Josefina “Inday Pining” Gullas nga usa sa iyang mga anak.
Samtang ang pangulo sa Commission on the Laity Fe Barino niawhag sa mga lain-lain nga Lay Organizations sa Archdiocese of Cebu sa pagyukbo kang Vidal pinaagi sa pagbilar sa haya. (BANAT NEWS)
- Latest
