Magpakailan Man, MMK paborito ni Vidal

CEBU, Philippines — Atong ilhon ang simple nga kinabuhi ni Archbishop Emeritus Ricardo Cardinal Vidal sa iyang pagpuyo sa Dakbayan sa Sugbo, sulod sa 30 kapin ka tuig pinaagi sa iyang kauban sa panimalay atol sa iyang panerbisyo ug sa labandera niini nga si Rodelia Dagodog.

Matud pa ni Celestino Tumale, kauban ni Vidal sa panimalay niini sulod sa 34 ka tuig isip helper, driver, janitor ug uban pa susama og igsuon ug amahan ang iyang pagtan-aw niini ilabi maayo kaayo kini kaniya ug sa namugna niyang pamilya.

Sumala pa ni Tumale sobra ka manggihatagon dili lamang kaniya kondili  ngadto usab sa iyang mga kaparian ang cardinal.

Dugang pa ni Tumale, tanan niyang mga anak ang gigastohan sa Cardinal sa pagtuon ug magpaabot na lang sila unsay plano sa Arsobispo kanila ilabi na wala na  ang iyang giserbisyohan niini ug anaa sila kasamtangan nagpuyo sa gipuy-an ni Vidal.

Gitug-an ni Tumale, naglakip sa mga pagkaon nga ganahan ni Vidal mao ang pinirito nga isda, kanding, ug dugo-dugo, ug dili kaayo kini mahilig sa mga sinabaw nga sud-an, samtang Pizza, pinirito nga saging, ug puto maya alang sa iyang snacks.

Mga salida nga kinaham ni Vidal mao ang ang Maala-ala Mo Kaya, ug Santino.

Mahiligon usab si Vidal og duwa nga basketball, motukar og piano ug ang pagpaminaw  ug pagkanta og mga awit binisaya sama sa “Matud Nila” ug “Magpakailanman” ug uban pa.

Si Vidal mopalit sa iyang mga kagamitan sa pagka cardinal gikan sa Bulacan nga ginama ni Tito Santos. Sa kinatibuk-an gipasalamatan ni Tumale si Cardinal sa tanan niini nga mga kaayo.

Si Dagodog sa iyang bahin nitug-an dako kaayo og natabang kaniya ang Cardinal human gipanganak niya ang person with disabilities nga anak pinaagi sa caesarian section ug pagkahimong professional sa pito ka mga anak niini. Gitug-an ni Dagodog, gikan sa pagka arsobispo ni Vidal hangtod na sa pagretiro niini pabilin gihapon kining manggihuna-hunaon, matinabangon  sa uban. (BANAT NEWS)