Duha ka managsuon gilugos sa papa

CEBU, Philippines — Duha ka managsuong babaye gilugos sa amahan didto sa usa sa mga barangay sa lungsod sa Dalaguete niadtong Miyerkules.

Ang Dalaguete Police Station mitug-an sa Banat News nga midangop ang 12-anyos kuyog ang iyang igsuong babaye ug iyang inahan sa panimalay sa ilang barangay kapitan human sa hitabo.

Matud pa ni SPO1 Rodrigo Teo gisulong sa suspek ang kapitan nga nagdala og paltik .22 revolver ug nanghulga nga adunay di maayong mahitabo sa mga bata sa panimalay niini. Tungod niini ilang gidakop ang suspek tungod sa paghupot og armas. Sigun pa sa kapolisan ang mga biktima mitug-an nga dugay na kining gibuhat sa suspek ngadto sa mga anak.

Giingong una niining giabuso ang 18 anyos nga maguwang hinungdan nga kini milayas ug karon gisunod niini paglugos ang 12 anyos. Ning pagsuwat, napasakaan na og kasong paghupot og ilegal nga armas samtang kasamtangan pang gitrabaho ang kasong rape nga ipasaka batok sa maong amahan. (BANAT NEWS)