9-anyos nalumos sa bangag

CEBU, Philippines — Patay ang usa ka 9-anyos nga batang lalaki human natagak ug nalumos sa gikawot nga yuta para butangan og haligi sa tukorong simbahan diha sa Sitio Proper, Barangay Jaclupan, Dakbayan sa Talisay niadtong Martes sa hapon.

Ang namatay nailhan nga si Sefury Walteros, nagpuyo sa maong dapit.

Ang apuhan nga si Lilia Labrador nitug-an nga nipauli sa ilang panimay ang bata tungod kay wala man kini klase.

Giagda pa niya kini nga mangaon apan nibalibad ang apo kay gustong magduwa sa gawas.

Paglabay og pila ka oras gipapangita kini sa apohan ngadto sa maguwang kay aduna siyay lakwon. Sumala pa wala motug-an ang maguwang nga wala niini makit-i ang manghod hangtud nga naabtan na lang og gabii. Nianang Miyerkules sa kaadlawon ang mga nagpatrolyang barangay tanod nakakita sa bata nga naglutaw na sa napundong tubig sa gikawot nga yuta para pundasyon sa simbahan ug wala na kini kinabuhi.

Si Kapitan Joel Obeso sa Barangay Jaclupan nitug-an nga ang maong simbahan inisyatiba sa tanang mga molupyo sa lugar tungod kay nagkadaghan man sila sa ilang barangay ug gusto silang makabaton og mas dako nga balay ampoanan.

Gumikan niini nagtinabangay ang simbahan, ang barangay opisyales ug mga katawhan sa pagkawot sa yuta aron ilang kabutangan sa haligi sa simbahan.

Apan sa dihang nagsige ang uwan napuno og tubig ang ilang gikawot nga yuta hinungdan nga gihimong kalingawan sa mga bata kun mobunok ang uwan.

Matud ni Obeso gidid-an gyud nila ang mga bata nga magduwa sa site apan gituohan nga way trabaho ang mga panday atol sa pagkahitabo.

Si Eliseo Lobiano, team leader sa mga nagtrabaho sa simbahan nagkanayon nga niadtong Agosto nagsugod ang ilang trabaho.

Matud niya wala sila’y gitugutan nga makasulod sa lugar ug nagduda siya nga nisud ang bata dihang wala na sila sa site.

Di na interesado ang apohan sa bata nga ipaawtopsiya ang lawas kay kumbinsido man sila nga nadisgrasya ra gyud kini.

Samtang nagbutang na sila og signages nga “no entry” sa lugar aron di na masubli ang maong hitabo.

Ang barangay misaad nga mohatag og hinabang alang sa pagpahiluna sa lawas sa namatay. (BANAT NEWS)