Delivery truck natumba, 5 angol
CEBU, Philippines — Naangol ang lima ka tawo dihang natumba ang usa ka trak de karga sa may usa ka mall sa Poblacion 3, Carcar, Dakbayan sa Carcar kagahapon sa kaadlawon.
Si PO3 Miguel Bernabe sa Carcar City Police Station niila ni Wilson Dagohoy, 24, taga Bayawan City, Negros Oriental, nga maoy drayber sa Mitsubishi cargo truck nga adunay plate number nga GWX-493.
Base sa inisyal nga imbestigasyon, ang maong trak gikan sa Siyudad sa Sugbo paingon sa Moalboal aron unta mag-deliver og nagkadaiyang klase sa ilimnon.
Pagliko sa naasoy nga lugar giingong wala na nakontrol ni Dagohoy nga miresulta sa pagkalimbuwad sa sakyanan ug niangol sa upat ka sakay niini.
Naguba sab ang guardhouse sa usa ka mall sa maong lugar human kini natumbahan sa mga karga.
Nagtuo ang kapolisan nga ang kabug-at sa karga ang hinungdan sa pagkatumba sa trak.
Dugang ni Bernabe nga walay kaso nga ipasaka batok sa drayber human nisaad ang tag-iya nga si Carlito Chua nga moabaga sa gastuhan sa mga nangaangol ingon man ang naguba gumikan sa maong aksidente. (BANAT NEWS)
- Latest
