Duha sikop sa PDEA
CEBU, Philippines — Nasikop ang duha ka gidudahang pushers sa managlahing buy-bust operation sa mga operatiba sa Philippine Drug Enforcement Agency sa Dakbayan sa Naga ug Dakbayan sa Sugbo.
Niadtong Martes gidakop sa mga operatiba sa PDEA-7 sa Barangay Langtad, Dakbayan sa Naga si Randy Abangan, 46-anyos, kinsa nakuhaan og lima ka pakete sa gituohang shabu nga motimbang og lima ka gramo ug gibana-banang mokantidad og P25 mil.
Matud sa tigpamaba sa ahensya nga si Leia Albiar nga ang kapolisan sa dakbayan ang nag-monitor sa dinakpan subay sa mando ni Presidente Rodrigo Duterte nga igo na lang sila sa intelligence report ug ang PDEA na ang bahala nga modakop niini.
Ang dinakpan giingong makabaligya og 25 gramos matag semana.
Sa Barangay Suba, Dakbayan sa Sugbo, mobalor og P150 mil nga shabu ang nakuha gikan sa nadakpan sa mga operatiba nga si Mirasol Sumalinog, 33-anyos.
Si Albiar niingon nga lakip unta nga dakpon ang katipon ni Sumalinog nga si Alvin Yburan apan dali kining nakasibat.
“Silang duha gyud ang target, ang barangay mismo ang nihatag nato og info then gi-verify sa team. Dugay na daw to nagduwa but nihawa unya nibalik ra sad dayon,” matud ni Albiar.
Nakuha gikan sa dinakpan ang duha ka putos sa gidudahang shabu nga motimbang og 30 ka gramos.
Dugang ni Albiar nga makabaligya og 50 hangtud sa 100 ka gramos nga shabu matag semana sila si Sumalinog ug Yburan.
Pasakaan og kasong paghupot ug pagpamaligya og shabu ang duha ka dinakpan samtang padayon pa ang pagpangita sa nakasibat nga si Yburan. (BANAT NEWS)
- Latest
