Way Maute sa Sugbo

CEBU, Philippines — Nipasalig si Konsehal Dave Tumulak nga walay namatikdan nga presensiya sa mga sakop sa Maute sa Dakbayan sa Sugbo.

Ang maong grupo ang niilog sa Marawi City niadtong Mayo 23 nga niresulta sa kamatayon sa dul-an 1,000 ka tawo.

Gikompirmar ang kamatayon sa duha ka giilang lider sa Maute nga sila si Isnilon Hapilon ug Omar Maute niadtong Oktubre 16 ug gituohan nga moresulta kini sa pagpamalhin sa mga kauban.

Sigun ni Tumulak nga padayon ang pagpangandam sa hugot nga seguridad ilabi na sa mga pantalan sa Sugbo pinaagi sa mga sakop sa kasundaluhan, National Intelligence Coordinating Advisory ug uban pang intelligence groups sa siyudad.

Giawhag ni Tumulak ang katawhan nga magmatngon sa palibot og motaho kung adunay mamatikdan nga gidudahan sa ilang palibot.

Gipasalig ni Tumulak nga hugot gihapon ang seguridad ilabi na karong umaabot nga Kalag-kalag. (BANAT NEWS)